शिखर इन्स्योरेन्सकाे बीमाशुल्क आर्जन ७८ करोड, प्रतिसेयर आम्दानी कति?

काठमाडौं । शिखर इन्स्योरेन्स कम्पनी लिमिटेडले चालू आर्थिक वर्षको दोस्रो त्रैमासिकसम्मको वित्तीय विवरण सार्वजनिक गरेको छ । इन्स्योरेन्सले ७८ करोड रुपैयाँभन्दा बढी खुद बीमाशुल्क आर्जन गरेको हाे ।

कम्पनीकाे पुस मसान्तसम्म खुद बीमाशुल्क ७८ करोड ५ लाख रुपैयाँ पुगेको छ, जुन अघिल्लो आर्थिक वर्षको सोही अवधिको ६३ करोड ७६ लाख रुपैयाँको तुलनामा २२.४१ प्रतिशतले बढी हो ।

समीक्षा अवधिमा कम्पनीको कुल आम्दानी १ अर्ब १६ करोड ३३ लाख रुपैयाँबाट बढेर १ अर्ब २२ करोड ९८ लाख रुपैयाँ पुगेको छ । कुल खर्च भने उल्लेखनीय रूपमा बढेर ७९ करोड ७८ लाख रुपैयाँबाट १ अर्ब २९ करोड ९३ लाख रुपैयाँ पुगेको छ। अभिकर्ता कमिशन खर्च पनि बढेर ३ करोड २२ लाख रुपैयाँ पुगेको कम्पनीले जनाएको छ ।

२ अर्ब ९३ करोड रुपैयाँ चुक्ता पूँजी रहेको कम्पनीको स्पेशल रिजर्भमा १ अर्ब ९१ करोड ७६ लाख रुपैयाँ, महाविपत्ति कोषमा १६ करोड ११ लाख रुपैयाँ र जगेडा कोषमा १६ करोड ५७ लाख रुपैयाँ सञ्चित रहेको छ ।

कम्पनीको प्रतिसेयर आम्दानी १९.३९ रुपैयाँबाट घटेर ३.०६ रुपैयाँ ऋणात्मक भएको छ भने सोल्भेन्सी अनुपात ४.७४ प्रतिशत कायम भएको छ। प्रतिसेयर नेटवर्थ १९६.६४ रुपैयाँ रहेको छ ।