हङकङविरुद्ध नेपालको सानदार जित

काठमाडौं । नेपालको महिला यु १९ टिमले अर्को एकतर्फी प्रतिस्पर्धामा हङकङलाई १ सय ८१ रनको विशाल अन्तरले हराएको छ । एसीसी यु १९ महिला प्रिमियर कप अन्तरगतको खेलमा नेपालको यो लगातार दोस्रो जित हो । पहिलो म्याचमा नेपालले सिंगापुरलाई १ सय ५१ रनले पराजित गरेको थियो ।

आजकाे खेलमा नेपालले पहिले ब्याटिङ गर्दै ६ विकेट क्षतिमा २ सय ११ रनको विशाल स्कोर बनायाे । नेपालका लागि कप्तान सोनी पाख्रिनले ६० बलमा सर्वाधिक ९० रन बनाइन् । उनले १३ चौका र १ छक्का प्रहार गरेकी थिइन् । ओपनर सावित्री धामी ३६ बलमा ५२ रन बनाएर आएट हुँदा अलिसा कुमारी यादवले १२ बलमा २३ रनको केमियो इनिङ खेलिन् ।

हङकङका लागि निम्रा अरबले दुई विकेट लिइन् ।

जवाफी ब्याटिङमा हङकङले लक्ष्य पछ्याउने चेष्टा नै गरेन । हङकङकी वङ विङ किउ हेलीले मात्रै दोहोरो स्कोरमा रन बटुल्न सकिन् । उनले टेस्ट शैलीमा ब्याटिङ गर्दै ४५ बलमा १३ रन जोडिन् ।

नेपालकी कप्तान सोनी पाख्रिनले ४ ओभरमा ४ रन मात्रै दिएर ४ विकेट लिइन् । मनिषा उपाध्यायले २ विकेट हात पारिन् ।