चितवन। खाना पकाउने एलपी ग्यासको अभाव भएपछि स्थानीय प्रशासनले चितवन र नवलपरासीका ग्यास उद्योगबाट भरी सिलिन्डर ल्याएर एकै ठाउँबाट बिक्री गरिरहेका छ।
यसअघि जिल्लालाई पाँच क्षेत्रमा विभाजन गरेर भूगोलअनुसार व्यवसायीलाई बिक्री गर्न लगाएको प्रशासनले आज भरतपुर महानगर–९ मा रहेको केन्द्रीय बस ट्रमिनलबाट जिल्लाका तीन उद्योग र गैँडाकोटको एउटा उद्योगलाई ग्यास बिक्री गर्न लगाएको हो।
दिउँसो १ः०० बजेदेखि जिल्लाका बाबा, साईबाबा, नेपाल ग्यास र नवलपुरको जानकी ग्यास उद्योगले सिधैँ उपभोक्तालाई भरी सिलिन्डर वितरण गरिरहेका छन्। सो क्रममा चार उद्योगले तीन हजार सिलिन्डर बिक्री गरिएको जनाएका हुन्।
ग्यास अभावसम्बन्धी स्थानीय प्रशासनको टोलफ्रि नम्बरमा आएका गुनासो सम्बोधन गर्दै एक हजारभन्दा बढी उपभोक्ताको घरमा ग्यास पुर्याइएको प्रमुख जिल्ला अधिकारी गणेश अर्यालले जानकारी दिए।
स्थानीय प्रशासनले ग्यास उद्योग, डिलरलगायतमा अनुगमन गर्दा पनि उपभोक्ताकोमा ग्यास नपुगेपछि उद्योगीमार्फत उपभोक्ताको घरमा पुर्याउन लागिएको उनले बताए।
यसरी वितरण गर्दा पनि ग्यास पाउन नसकेका उपभोक्तालाई बसपार्कबाट वितरण गरिएको प्रजिअ अर्यालले जानकारी दिए। यसअघि वितरण गरिएका आधा सिलिन्डर सकिएसँगै एकैपटक माग बढेको हुन सक्ने उनले बताए।
पछि पुनः ग्यास अभाव हुन्छ भन्ने लागेर पनि उपभोक्ताले आवश्यकताभन्दा बढी सिलिन्डर भण्डारण गर्नाले अहिले ग्यासको समस्या देखिएको उनको भनाइ छ।–रासस
प्रतिक्रिया