भोटेकोशी लिस्तीका किसानलाई चौँरी वितरण गरिने

सिन्धुपाल्चोकको भोटेकोशी गाउँपालिका–१ लिस्तीका चौँरीपालक किसानलाई उन्नत नश्लका चौँरी वितरण गरिने भएको छ । एशिया इन नामक अन्तर्राष्ट्रिय गैरसरकारी संस्थाको आर्थिक सहयोगमा गाउँपालिकाको समन्वयमा लिस्तीको बगाम र छगाम गाउँका किसानको समूह गठन गरी अनुदानको रुपमा ७५ वटा चौँरी वितरण गरिने गाउँपालिकाका अध्यक्ष राजकुमार पौडेलले बताए । प्रतिचौँरीको रु ९० हजारदेखि एक लाखसम्म पर्ने र चौँरी तथा चीज कारखाना स्थापनाको लागि संस्थाले रु ९५ लाख प्रदान गर्ने भएको छ । रु २५ लाखमा निर्माण गरिने चीज कारखानाको लागि पालिकाले ५० प्रतिशत ब्यहोर्ने पालिकाले जनाएको छ ।

समुद्री सतहबाट तीनहजार मिटरको उचाइमा पर्ने उक्त गाउँमा चौँरी पालक किसानको २०÷२५ गोठ रहेका छन् । प्रतिगोठमा १५ देखि ३० वटा चौँरी रहेको र त्यहाँका किसानले उत्पादित घ्यू स्थानीयस्तर र राजधानीका गुम्बामा पुग्छ । किसानले हातैले निर्माण गरेका छुर्पी जापान, युरोप, अमेरिका र दक्षिण कोरियामा पुग्ने भएकाले एकजना किसानले २० वटा चौँरीबाट वार्षिक रु १० लाखसम्म आम्दानी गर्ने वडाध्यक्ष मुके शेर्पाले बताए ।

यसैगरी संस्थाको रु २५ लाखको आर्थिक सहयोगमा सोही वडाको सबुखानी र तारतुम गाउँमा खानेपानी योजना सञ्चालन गरिने भएको छ । खानेपानीको अभाव झेलिरहेका स्थानीय २०० घरपरिवारको लागि एक घर एक धाराको अवधारणाअनुसार २०० धारा वितरण गरिने कार्यक्रम रहेको पालिकाले जनाएको छ ।