आन्तरिक पर्यटकको मुख्य क्षेत्र बन्दै गएको दाङको पर्यटकीयस्थल छिल्लीकोट मन्दिरमा दर्शन गर्न गएका दाजुलाई कुटपिट गरि बहिनीमाथि दुर्व्यवहार गर्ने एक युवक पक्राउ परेका छन् । प्रहरीका अनुसार घटनामा संलग्न भइ फरार अन्य ४/५ जना युवाको खोजी भइरहेको छ ।
इलाका प्रहरी कार्यालय तुलसीपुरका प्रहरी प्रवक्ता झलकप्रसाद शर्माका अनुसार पक्राउ पर्नेमा तुलसीपुर उपमहानगरपालिका वडा नं. १९ छिल्लीकोटका २१ वर्षीय बलदेब परियार रहेका छन् ।
शनिबार दिउँसो तुलसीपुर बजार क्षेत्रबाट पर्यटकीय तथा धार्मिकस्थल छिल्लीकोटको भ्रमणका लागि दाजु र केही आफन्तसँगै पुगेकी १७ वर्षीया किशोरीलाई परियारको समूहले जोरजवरजस्ती हातपात गरेको थियो । दाजुले त्यसो नगर्न आग्रह गर्दा र रोक्न प्रयास गर्दा मदिराले मातेका परियारको समूहले ती किशोरीका १९ वर्षीय दाजुलाई निर्घात कुटपिट गरि घाईते बनाएका थिए ।
प्रहरी निरीक्षक शर्माका अनुसार घाइतेको कोहलपुर मेडिकल कलेजमा उपचार भइरहेको छ भने उनीमाथि ढुंगा र हात खुट्टाले चार/पाँच जना मिलेर कुटपिट गर्दा टाउको र शरीरका विभिन्न भागमा चोट लागेको छ । ती किशोरीले पानी ट्याङ्की नजिकै दिउँसो डेढ बजेतिर पानी पिउँदै गर्दा मदिराले मातेका परियारले जोरजवरजस्ती हातपात गरेका थिए ।
प्रहरी प्रवक्ता शर्माले भने ‘किशोरीको संवेदनशील अंगमा हात हाल्दै जोरजवरजस्ती गर्न खोजेपछि सँगै रहेका दाजु र आफन्तले त्यसो नगर्न भन्दै रोक्न खोज्दा उल्टै दाजुमाथि निर्घात कुटपिट भएको रहेछ,’ ‘किशोरीमाथि जोरजवरजस्ती हातपात र दुर्व्यवहार परियार एक्लैले गरेको भए पनि उनका दाजुलाई समात्न र कुटपिट गर्न अन्य ४/५ जना युवाले सघाएको खुल्न आएको छ ।’
छिल्लीकोट मन्दिर पहाडी र वन जंगलको क्षेत्रमा छ ।
प्रतिक्रिया