काठमाडौं । नेपाल प्रिमियर लिग एनपीएल क्रिकेटअन्तर्गत आज दुई खेल हुँदैछन्। कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने पहिलो खेलमा काठमाडौं गोर्खाज र सुदूरपश्चिम रोयल्सबीच प्रतिस्पर्धा हुनेछ।
खेल दिउँसो साढे १२ बजे सुरु हुनेछ। पाँच खेलबाट चार जित र एक हारसहित आठ अंक जोडेको काठमाडौं अंकतालिकाको दोस्रो स्थानमा छ। यस्तै, ६ खेल खेलेको सुदूरपश्चिम चार जित र दुई हारसहित आठ अंकका साथ तेस्रो स्थानमा छ।
आजै हुने दोस्रो खेलमा चितवन राइनोजले जनकपुर बोल्ट्सको सामना गर्नेछ। यी दुई टोलीबीचको खेल दिउँसो साढे ४ बजे सुरु हुनेछ।
पाँच खेलबाट दुई जित, दुई हार र एक खेल वर्षाका कारण रद्द हुँदा अंक बाँडेको चितवन पाँचौं स्थानमा छ। यस्तै, जनकपुर ६ खेलबाट दुई जित र चार हारसहित छैटौं स्थानमा छ।
प्लेअफको दौडमा आफूलाई बलियो बनाउने लक्ष्यसहित मैदान उत्रने यी चारै टोलीका लागि आजका खेल महत्त्वपूर्ण हुनेछन्।
प्रतिक्रिया