नेपालीहरुको महान चाड दशैंलाई लक्षित गरी नेपाल राष्ट्र बैंकले आजदेखि नयाँ नोट वितरण सुरु गरेको छ । कोरोनाको जोखिम कायमै रहेका कारण भिडभाड कम गर्न र सर्वसाधरणले सहज किसिमले नयाँ नोट साट्न सकुन् भन्ने उदेश्यले राष्ट्र बैंकले दशैं सुरु हुनुभन्दा अगाडी नै नयाँ नोट वितरण गर्न थालेको हो ।
कोरोना महामारी केही कम भए पनि जोखिम कायमै रहेका कारण भिडभाड नहोस् भनेर यस वर्ष चाडैदेखि नयाँ नोट वितरण गर्न लागिएको राष्ट्र बैंकका प्रवक्ता देवकुमार ढकालले बताए । उनले आजबाट नयाँ नोट वितरण गर्न सबै बैंक तथा वित्तीय संस्थालाई माग अनुसारको नयाँ नोट पठाइसकिएको पनि जानकारी दिए ।
ढकालका अनुसार राष्ट्र बैंकले बालुवाटार कार्यालय र प्रदेश स्थित प्रादेशिक कार्यालयहरूबाट नयाँ नोट वितरण गर्नेछ । साथै ‘क’ वर्गका बैंकहरुले समेत दशैंका लागि नयाँ नोट वितरण गर्नेछन् । राष्ट्र बैंकको केन्द्रीय कार्यालयदेखि सबै प्रदेशका कार्यालयहरूबाट नयाँ नोट वितरण हुन्छन् ।
राष्ट्र बैंकले प्रतिव्यक्ति १८ हजार पाँच सय रुपैयाँसम्म नयाँ नोट सटही गर्ने सुविधा दिएको छ । जसमा ५, १०, २०, ५० र १०० का १/१ प्रति बन्डल सटही हुने राष्ट्र बैंकले जनाएको छ ।
हरेक वर्ष दशैंमा नयाँ नोट वितरण गर्दै आएको राष्ट्र बैंकले गत वर्ष कोरोना महामारीका कारण नयाँ नोट वितरण गरेको थिएन । यस वर्ष कोरोना सङ्क्रमण निकै घटेपछि नयाँ नोट वितरण गर्न लागेको हो ।
प्रतिक्रिया