Logo

राजनीति

विवेशील साझाले भन्‍यो – आक्रमणकारीलाई कडा कारबाही गरियोस् 



बाँकेको भेरी अस्पतालमा चिकित्सक तथा स्वास्थ्यकर्मीहरूमाथि भएको आक्रमण तथा तोडफोडप्रति विवेकशील साझा पार्टीले गम्भीर खेद प्रकट गरेको जनाएको छ । 

विवेकशील साझा पार्टीका प्रवक्ता शरदराज पाठकले शुक्रबार एक विज्ञप्ति जारी गर्दै आक्रमणकारीलाई राजनीतिक संरक्षण नभइ कडा कारबाही गर्न माग गरेका हुन् । 

विज्ञप्तिमा भनिएको छ, “आक्रमणमा सत्तारूढ एमालेका प्रदेश तहका नेताको संलग्नता रहेको भनी खबरहरू सार्वजनिक भएका छन् । समाजमा परिचित गुण्डालाई मन्त्री बनाएर पुरस्कृत गर्ने नेता भएको देशमा दलका नेताहरू पनि गुण्डागर्दीमा संलग्न हुनु अस्वाभाविक होइन । तर पनि आक्रमणकारीहरूलाई राजनीतिक संरक्षण नदिई कानुनी कारबाही गर्न तथा भेरी अस्पतालसहित देशभरका स्वास्थ्यकर्मीले निर्धक्क भइ काम गर्ने वातावरण सुनिश्चित गर्न विवेकशील साझा पार्टी सरकारसँग जोडदार माग गर्दछ ।”

राज्यको स्वास्थ्य प्रणाली फितलो रहँदा र सरकारको अकर्मण्यताले गर्दा मुलुकभर स्वास्थ्यकर्मीहरू यस्तो महामारीको समयमा अत्यन्त सीमित स्रोत, साधन र जनशक्तिका साथ अहोरात्र खटिनु परिरहेको विवेकशील साझा पार्टीले जनाएको छ । 

विज्ञप्तिमा थप भनेको छ, “आफू स्वयं र परिवार कुनै पनि बेला सङ्क्रमित हुनसक्ने जोखिम बोकेर तथा कतिपय स्थानमा आफू सङ्क्रमित भइकन पनि सुरक्षा मापदण्ड अपनाइ अन्य सङ्क्रमितको उपचारमा सक्रिय स्वास्थ्यकर्मीहरूको उच्च सम्मान गर्नु पर्नेमा उल्टै सांघातिक आक्रमण हुनु अत्यन्त निन्दनीय छ ।”

विवेकशील साझा पार्टीले देशभरका स्वास्थ्य संस्थाहरूमा तोडफोड र स्वास्थ्यकर्मीहरूमाथिको आक्रमणलाई निरुत्साहित गर्न आक्रमणकारीहरू धरौटीमा नछुट्ने र कडा कानुनी दण्डको भागिदार हुनै पर्ने गरी कानुन संशोधन गर्नुपर्ने समेत जनाएको छ । 

प्रकाशित मिति : १४ जेष्ठ २०७८, शुक्रबार  २ : २९ बजे