काठमाडौँ । पत्रकारहरुले राजधानी दैनिक पत्रिकाको व्यवस्थापन मिलाएर पत्रिका प्रकाशन गर्न माग गरेका छन् ।
राजधानी न्युज पब्लिकेसन प्रालिद्वारा प्रकाशित राजधानी दैनिक पत्रिका विगत केही हप्तादेखि प्रकाशन हुन सकेको छैन । विभिन्न कारण देखाएर राजधानी दैनिक पत्रिकाले कार्यरत कर्मचारीहरुलाई पनि तलब सुविधा दिन नसकेको भन्दै विभिन्न चरणमा बार्तासमेत भएका छन् ।
अहिले पत्रिका बन्द भएको र तलब पनि नपाएको भन्दै नेपाल पत्रकार महासंघ राजधानी दैनिक प्रतिष्ठान शाखाले गम्भीर ध्यानाकर्षण भएको जनाएको छ । महासंघले पत्रिका बन्द गरेर पत्रकार र कर्मचारीलाई राजीनामा दिन बाध्य पारिएको भन्दै ध्यानाकर्षण पत्र जारी गरेको हो ।
राजधानी दैनिक पत्रिका गएको जेठ २६ गतेदेखि पूर्ण रुपमा प्रकाशन बन्द रहेको छ । पत्रिका छपाईका लागि कागज किन्ने विषयमा सञ्चालकहरुबीच विवाद भएपछि पत्रिका प्रकाशन नभएको बताइएको छ ।
गएको २३ वर्षदेखि प्रकाशन हुँदै आएको राजधानी दैनिक पत्रिका बन्द भएको विषयमा सामान्य सूचनासमेत प्रकाशन नगरी पाठकको सूचना पाउने हकको हनन भएको भन्दै आपत्ति पनि जनाइएको छ । प्रतिष्ठानले व्यवस्थापनमा देखिएको किचलो चाँडोभन्दा चाँडो टुङ्ग्याएर तत्काल पत्रिका प्रकाशन सुचारु गर्न र नियमित तलब उपलब्ध गराउन माग गरिएको छ ।
प्रतिक्रिया