धनगढी । सुदूरपश्चिम प्रदेश सभाको सातौँ अधिवेशन अन्तर्गत आइतबार बसेको पाँचौँ बैठकले दुई महत्त्वपूर्ण विधेयकहरूलाई दफावार छलफलका लागि सम्बन्धित समितिमा पठाएको छ।
२०८२ साल चैत्र २९ गते आइतबार बसेको बैठकले प्रदेशको सञ्चार क्षेत्र र कृषि क्षेत्रसँग सम्बन्धित विधेयकहरूलाई समितिमा पठाउने निर्णय गरेको हो।
बैठकले ‘सुदूरपश्चिम प्रदेशमा आमसञ्चार सम्बन्धमा व्यवस्था गर्न बनेको विधेयक’ लाई दफावार छलफलका लागि विधायन तथा प्रदेश मामिला समितिमा पठाएको छ।
सुदूरपश्चिम प्रदेश सभा नियमावली, २०८० को नियम १११ को उपनियम (१) को (ख) बमोजिम उक्त विधेयकलाई समितिमा पठाइएको हो। यो विधेयकले प्रदेशभित्रको आमसञ्चार क्षेत्रलाई व्यवस्थित र मर्यादित बनाउने लक्ष्य राखेको छ।
त्यसै गरी, सोही बैठकले ‘सुदूरपश्चिम प्रदेश जीवनाशक विषादी व्यवस्थापन सम्बन्धमा व्यवस्था गर्न बनेको विधेयक’लाई पनि दफावार छलफलका लागि सामाजिक विकास समितिमा पठाएको छ।
यो विधेयक पनि प्रदेश सभा नियमावली, २०८० को नियम १११ को उपनियम (१) को (ख) बमोजिम नै समितिमा पठाइएको हो।
कृषि क्षेत्रमा बढ्दो जीवनाशक विषादीको प्रयोगलाई नियन्त्रण र उचित व्यवस्थापन गर्न यो विधेयक ल्याइएको बताइएको छ।
प्रतिक्रिया