काठमाडौं । अमेरिकी राष्ट्रपति डोनाल्ड ट्रम्प ले इरानलाई सैन्य सहयोग गरेमा चिनियाँ सामानमा थप कर लगाइने चेतावनी दिएका छन्।
फक्स न्यूज को ‘सन्डे मर्निङ फ्युचर्स’ कार्यक्रममा उनले चीनले इरानलाई सहयोग गरेको पुष्टि भए ५० प्रतिशतसम्म अतिरिक्त भन्सार महसुल लगाइने बताएका हुन्।
“यदि हामीले त्यसो भएको देख्यौँ भने उनीहरूले ५० प्रतिशत थप शुल्कको सामना गर्नुपर्नेछ,” उनले भने।
इरानसम्बन्धी तनावका कारण सी जिनपिङ सँगको शिखर वार्ता ढिलाइ भएको उल्लेख गर्दै ट्रम्पले अर्को महिना बेइजिङ भ्रमण गर्ने योजना रहेको बताए।
अमेरिकी सञ्चारमाध्यमहरूले खुफिया स्रोतलाई उद्धृत गर्दै चीनले इरानलाई हवाई रक्षा प्रणालीमा प्रयोग हुने हतियार पठाउन लागेको दाबी गरेका छन्।
यसबारे सिएनएन ले सोध्दा ट्रम्पले चीनले त्यसो गरे ‘ठूलो समस्या’ हुने चेतावनी दिएका थिए।
यसैबीच, संयुक्त राज्य अमेरिका र इजरायल ले फेब्रुअरी २८ मा इरान माथि संयुक्त आक्रमण गरेका थिए।
पछिल्लो समय अमेरिका र इरानबीच अस्थायी युद्धविराम भए पनि स्थायी समाधानका लागि पाकिस्तान मा भएको वार्ता निष्कर्षविहीन बनेको छ।
अमेरिकी उपराष्ट्रपति जेडी भान्स का अनुसार शनिबारदेखि आइतबार बिहानसम्म चलेको वार्ताबाट कुनै ठोस सहमति हुन सकेन।
प्रतिक्रिया