साविक विजेता टोली लुम्बिनी लायन्सले नेपाल प्रिमियर लिग (एनपिएल) को तेस्रो सिजनको उद्घाटन खेलमा विजयी शुरुवात गरेको छ । लुम्बिनीले गत सिजनको फाइनलमा पनि हराएको टोली सुदुरपश्चिम रोयल्समाथि ७ विकेटको फराकिलो जित हात पारेको हो । मात्र ८८ रनको लक्ष्य लुम्बिनीले केबल ९ दशमलव ५ ओभरमा ३ विकेट गुमाएर भेटायो।
लुम्बिनीका लागि ओपनर डी आरसी शर्ट र आसिफ शेखले पहिलो विकेटका लागि ७१ रनको साझेदारी गर्दै टोलीलाई जितको नजिक पुर्याएका थिए । सर्ट ४० रनमा अनिल खरेलको बलमा आउट भए । उनले १८ बलमा ४ चौका र ३ छक्का प्रहार गरे । अर्का ओपनर आसिफ ३२ रन बनाएर अनिलकै बलमा आउट भए। उनले २५ बलमा २ चौका र २ छक्का प्रहार गरे।
सुदूर पश्चिमका लागि अनिल खरेलले २ र कप्तान दीपेन्द्रसिंह ऐरीले एक विकेट लिए ।
त्रिवि मैदानमा टस हारेर पहिले ब्याटिङ गरेको सुदूरपश्चिम १७ दशमलव २ ओभरमा मात्र ८७ रनमा समेटियो। सुदूरपश्चिमका लागि कप्तान दीपेन्द्र सिंह ऐरीले २७ रन बनाउनुबाहेक अन्यले सम्झनलायक प्रदर्शन गरेनन् । उसका अनिल खरेलले १५ र जाइबले १३ रन बनाए ।
सुदूरपश्चिमलाई धरासायी बनाउन लुम्बिनीका किशोर महतोले ४ तथा शेर मल्लले ३ विकेट लिए ।
हार पछि सुदूरपश्चिमका मूख्य प्रशिक्षक सिमबाह उल हकले स्लो पिच हुनु र ब्याटरले राम्रो साझेदारी गर्न नसकेका कारण हार्नुपरेको भन्दै आगामी खेलमा प्रदर्शन सुधार्ने बताए ।
त्यसअघि प्रधानमन्त्री वालेन्द्र शाहले प्रतियोगिताको उद्घाटन गरेका थिए । त्यसपछि पनि उनी मैदानमै बसेर खेल हेरेका थिए ।
प्रतियोगितामा मंगलबार दुई खेल हुनेछन् । पहिलो खेलमा विराटनगर किंग्स र चितवन राइनोज खेल्नेछन् । यो खेल दिउँसो साढे १२ बजे शुरु हुनेछ । यस्तै साँझ ५ बजे शुरु हुने दोस्रो खेलमा कर्णाली याक्स र जनकपुर बोल्ट्स खेल्नेछन् ।
प्रतिक्रिया