डा. गोविन्द केसी उदयपुरमा अनसन बस्दै

काठमाडौं । चिकित्सा शिक्षा र स्वास्थ्य क्षेत्र सुधारका अभियन्ता डा. गोविन्द केसी अनसन बस्न उदयपुर जाने भएका छन्। सरकारसँग यसअघि भएका सहमति कार्यान्वयन नभएको भन्दै उनी कात्तिक १२ गतेदेखि गाईघाटमा अनसन बस्ने तयारीमा छन्।

डा. केसीका स्थानीय प्रतिनिधि गौरीशंकर उदासका अनुसार अनसनका लागि उपयुक्त स्थानको खोजी भइरहेको छ। डा. केसी आजै साँझसम्म गाईघाट आइपुग्ने जानकारी आफूले पाएको उनले बताए। तर, अनसनस्थल टुंगो नलागेकाले निर्धारित मितिमै अनसन सुरु हुने निश्चित भइनसकेको उनको भनाइ छ।

डा. केसीले गाईघाटस्थित बोक्सेको राधाकृष्ण मन्दिर परिसरमा अनसन बस्ने इच्छा व्यक्त गरेका थिए। तर, मन्दिर व्यवस्थापन समितिले धार्मिकस्थलमा राजनीतिक माग राखेर अनसन बस्नु उचित नहुने आशय व्यक्त गर्दै अनुमति नदिएको उदासले बताए। प्रशासनसँग पनि सहमति जुट्न नसकेपछि अर्को स्थानको खोजी भइरहेको उनले जानकारी दिए।

‘डा. केसीकै रोजाइमा मन्दिर परिसर परेको थियो। त्यसैले मन्दिर व्यवस्थापन समितिसँग आग्रह गर्‍यौँ, तर सहमति जुटेन,’ उदासले भने, ‘उहाँको उमेर र मौसमको पूर्वानुमानलाई ध्यानमा राखेर सुरक्षित स्थान खोजिरहेका छौँ।’

अनसनस्थल आजै निश्चित भए भोलिदेखि नै अनसन सुरु हुन सक्ने उनले बताए। ठाउँको टुंगो नलागे अनसनको मिति सर्न सक्ने सम्भावना पनि रहेको उनको भनाइ छ।

यता, उदयपुरका प्रमुख जिल्ला अधिकारी कृष्णबहादुर शाहीले भने डा. केसी अनसन बस्ने विषयमा आफूलाई औपचारिक जानकारी नभएको बताएका छन्। व्यक्तिगत वा संस्थागत रूपमा कसैले अनसन बस्नेबारे जिल्ला प्रशासन कार्यालयमा सूचना नआएको उनले बताए।

चिकित्सा शिक्षा सुधार, स्वास्थ्य सेवामा पहुँच र मेडिकल क्षेत्रमा रहेको भनिएको माफियातन्त्रको अन्त्यलगायत माग राख्दै डा. केसी यसअघि २४ पटक अनसन बसिसकेका छन्। उनले सन् २०१२ मा पहिलोपटक अनसन सुरु गरेका थिए। सरकारले माग सम्बोधन गर्ने सहमति गरेपछि अनसन तोड्ने, तर सहमति कार्यान्वयन नभएको भन्दै पुनः अनसन बस्ने क्रम चल्दै आएको छ।

पछिल्लोपटक उनी गत जुलाई २०२६ मा कैलालीको धनगढीमा सात दिन अनसन बसेका थिए। त्यसक्रममा सरकारसँग सातबुँदे सहमति भएपछि उनले अनसन तोडेका थिए। तर, उक्त सहमति कार्यान्वयन नभएको भन्दै उनीनिकट व्यक्तिहरूले पुनः अनसनको तयारी गरिएको बताएका छन्।