बेलायतबाट नेपाल आउने सम्पूर्ण यात्रुहरूमाथि रोक

नेपाल सरकारले बेलायतबाट आउने सम्पूर्ण उडान तथा यात्रुहरूमाथि नेपाल प्रवेशमा रोक लगाएको जनाएको छ । 

विश्वव्यापी महामारीको रुपमा फैलिरहेको कोरोना भाइरस बेलायतमा संक्रमण हुने दर बढ्दै गएको र नियन्त्रणभन्दा बाहिर गएपछि नेपाल सरकारले बेलायतबाट सीधै आउने उडान र बेलायतलाई ट्रान्जिट बनाई आउने दुवैथरि उडानहरूलाई नेपाल प्रवेशमा सरकारले रोक लगाएको हो । 

गृह मन्त्रालय अन्तर्गतको अध्यागमन विभागले जारी गरेको विज्ञप्तिमा भनिएको छ “विश्वव्यापी कोरोना महामारीको अवस्थालाई मध्यनजर गरी बेलायतबाट सुरु उडान वा ट्रान्जिट भई नेपाल आउने सम्पूर्ण यात्रुहरूलाई अर्को सूचना नभएसम्मको लागि नेपाल प्रवेश गर्न निषेध गरिएको” जानकारी दिएको छ । 

आजबाट लागू हुने गरी गरिएको निर्णय अनुसार अध्यागमन बिभागको उक्त सूचनासँगै अर्को सूचना जारी नभएसम्म बेलायतबाट सीधै वा बेलायतलाई ट्रान्जिट बनाएर आउने कसैले पनि नेपालमा प्रवेश पाउने छैनन् । 

पछिल्ला दिनहरुमा बेलायतमा दैनिक ३० हजारभन्दा बढी नयाँ कोरोना संक्रमित थपिदै आएका छन् ।