दोलखामा गुरुङ र पोखरेल दुवै आउट, प्रतिनिधीसभामा नयाँ पात्रको इन्ट्री !

मंसिर ४ गते हुने प्रतिनिधीसभा र प्रदेशसभाको निर्वाचनको लागि उमेदवारी दर्ताको केहि समय मात्रै बाँकी रहँदा चुनावी खेल निकै रोचक बनेको छ । सत्ता गठबन्धन र प्रमुख प्रतिपक्षी दल नेकपा एमाले भित्रको पनि चुनावी राजनीति निकै रोचक र घोचक बन्दै गएको छ ।

अधिकांश ठाँउमा उमेदवारको अन्तिम टुंगो नलागे पनि प्रमुख प्रतिपक्षी दल नेकपा एमालेले बागमती प्रदेशको दोलखा जिल्लाको प्रतिनिधीसभा र प्रदेशसभा दुवैतिरको टिकटको टुंगो लगाएको छ । प्रतिनिधीसभाको टिकटका लागि मुख्य आकांक्षी रहेका नेताहरुलाई रिङ बाहिर राख्दै नयाँ पात्रको हातमा प्रतिनिधीसभाको टिकट गएको छ ।

दोलखामा प्रतिनिधीसभा सदस्य पदका लागि पूर्व मन्त्रीहरु पार्वत गुरुङ र आनन्द पोखरेलबीच हानाथाप चलेको थियो, दूई नेताबीचको हानाथापलाई उछिन्दै अर्का नेता बालकृष्ण शिवाकोटीले टिकट हात पारेका छन् । गुरुङ र पोखरेल मध्ये एकले टिकट पाउने अुनमान र अपेक्षाकाबीच बालकृष्णले टिकट पाए पछि दोलखाको राजनीति निकै गर्माएको छ ।

एमाले अध्यक्ष केपी शर्मा अ‍ोलीले दोलखाका प्रतिनिधीसभा र प्रदेश सभाका तीनैजना उम्मेदवारको नाम बागमती प्रदेश इन्चार्ज काशीनाथ अधिकारीलाई दिएका छन् । अब एमालेबाट दोलखामा प्रतिनिधिसभाको टिकट बालकृष्ण शिवाकोटीले पाएका छन् ।

त्यस्तै प्रदेश १ को टिकट जिल्ला अध्यक्ष नरबहादुर श्रेष्ठ र २ को टिकट भीमेश्वर नगरपालिकाका निवर्तमान मेयर भरत केसीले पाएको एमाले स्रोतले जनाएको छ । यसअघि प्रतिनिधिसभामा आनन्द पोखरेल र प्रदेशमा क्रमशः नर श्रेष्ठ र बालकृष्ण श्रेष्ठको नाम सचिवालयमा छलफल भएको थियो । पोखरेल र गुरुङको गुट विभाजनका कारण कार्यकर्ता बाँडिने भएकाले तेस्रो व्यक्ति खोजिएको हो ।

शिवाकोटी नयाँ अनुहार र प्रतिष्ठित व्यवसायी हुन् । एमालेको विभिन्न तहमा लामो समय काम गरेका उनको चुनावी प्रतिस्पर्धा भने पहिलो हुनेछ । उनलाई उम्मेदवार बनाउँदा आनन्द र पार्वत दुवैजना नयाँ अनुहारको लागि मत माग्न हिँड्न बाध्य हुने भएकाले एमाले नेतृत्वले अन्तिममा चलाखी अपनाएको हो ।

दोलखा एमालेको निकै बलियो पकड क्षेत्र भएको जिल्लाका रुपमा चिनिन्छ । २०७४ सालमा भएको प्रतिनिधीसभाको निर्वाचनमा बाम गठबन्धनको तर्फबाट प्रतिनिधीसभाको उमेदवार भएका पार्वत गुरुङले विपक्षी उमेदवार भन्दा डबल बढि मतान्तरले चुनाव जितेका थिए ।