Logo

राजनीति

८४ मा गगनविरुद्ध चुनाव लड्दै पुण्य गौतम, रविलाई भेटेर मागे सहयोग



काठमाडौं । आफूलाई सामाजिक अभियान्ता बताउने पुण्य गौतमले उपप्रधानमन्त्री एवं गृहमन्त्री रवि लामिछानेसँग भेटघाट गरेका छन् ।

गृहमन्त्री निवासमा बुधबार राति रास्वपा केन्द्रीय सदस्य ज्वाला संग्रौलाको सहयोगमा गृहमन्त्रीलाई भेटेको गौतमले सामाजिक संजालमार्फत बताएका छन् । उनले भेटघाटमा समसामयिक राजनीतिक विषयवस्तुका साथै २०८४ सालको निर्वाचनका बारेमा पनि कुरा गरेको बताएका छन् ।

भेटमा पुण्यले आफू ८४ सालको चुनाव लड्ने योजनामा रहेको रविलाई सुनाएका थिए । उनले काठमाडौं ४ मा गगन थापाविरुद्ध आफूले उम्मेदवारी दिने भन्दै रविसँग सहयोगको आग्रह गरे । रविले यसमा सकारात्मक जवाफ दिएको पुण्य बताउँछन् । रविको भनाइ उद्धृत गर्दै पुण्यले भने, ‘तपाईँ योग्य मान्छे हो, तर अहिलेसम्म कतै पनि अवसर पाउनुभएको छैन । यदि चुनावमा उठ्नुभयो भने हाम्रोतर्फबाट सहयोग हुन्छ ।’

एक घण्टा लामो वार्तामा अत्यन्तै सार्थक राजनीतिक एवं पारिवारिक भलाकुसारी भएको छ र गृहमन्त्री लामिछानेले एमाले अध्यक्ष केपी शर्मा ओलीलाई देशभक्त नेता र प्रधानमन्त्री प्रचण्डलाई गतिशील नेताको रुपमा मुल्यांकन गरेको पुण्यले बताए ।

पुण्य गौतम अहिले एमालेमा छन् । काठमाडौंमा आयोजित आमसभामा एमाले अध्यक्ष केपी शर्मा ओलीको खुट्टा ढोग्दै उनी पार्टी प्रवेश गरेका थिए । तर, एमालेले आफूलाई कुनै पनि भूमिका र जिम्मेवारी नदिएकोमा उनी असन्तुष्ट छन् ।

काठमाडौंका मेयर बालेन साह र धरानका मेयर हर्क साम्पाङप्रती रविको गहिरो सद्भाव रहेको रविसँगको कुराकानीबाट थाहा पाएको उनले बताएका छन् ।

प्रकाशित मिति : ७ बैशाख २०८१, शुक्रबार १२:४८   :  बजे

54
Shares

अनलाइनपाना डटकममा प्रकाशित सामग्रीबारे कुनै सूचना, गुनासो, तथा सुझाव भए हामीलाई onlinepana@gmail.com मा लेखी पठाउनुहोला ।