Logo

प्रमुख समाचार

मेलम्ची विवाद: कर्मचारी लखेटेर मेलम्ची मुहानमा ताला



काठमाडौँ । मेलम्ची खानेपानी आयोजनाको मुहान क्षेत्रका स्थानीय बासिन्दाले मुहानबाट सुरुङमा पानी नै जान रोकिदिएपछि मेलम्चीको पानी काठमाडौँ आउन छोडेको छ । लामो समयदेखिका मागहरू सम्बोधन नभएको भन्दै बिहीबार दिउँसो साढे १ बजेदेखि मेलम्चीको पानी काठमाडौँ उपत्यका पठाउन बन्द गरेपछि पुनः खानेपानी संकट गहिरिने खतरा बढेको हो ।
२०७८ मा आएको विनाशकारी बाढीपछि तत्कालीन खानेपानीमन्त्री प्रदीप यादवसहित हेलम्बु र मेलम्चीका स्थानीयसँग भएको लिखित सम्झौता कार्यान्वयन नहुँदा स्थानीयहरु आन्दोलित बनेका हुन् ।
हेलम्बु गाउँपालिकाका अध्यक्ष निमा ग्याल्जेन ह्योल्मोले राज्यले स्थानीयसँग गरेको सम्झौता पालना नगरेकाले पानी बन्द गर्न बाध्य भएको स्पष्ट पारेका छन् । उनका अनुसार २०७८ असार १ गते तथा साउन १५ र १७ गते मेलम्ची नदीमा आएको बाढीका कारण स्थानीयलाई परेको समस्या समाधानका लागि तत्कालीन खानेपानी मन्त्री प्रदीप यादवको अध्यक्षतामा २०८१ असोज २१ गते बाढीपीडित संघर्ष समिति, स्थानीय राजनीतिक दलका प्रमुख, प्रतिनिधिहरू, लगायतका व्यक्तित्वहरूको उपस्थितिमा छलफल भएको थियो ।
उक्त छलफलले तयार पारेको प्रतिवेदन तथा कार्ययोजनाअनुसार विस्तृत सम्झौता भएको थियो । यो सम्झौताले बाढी प्रभावित क्षेत्रको पुनर्निर्माण, स्थानीय विकास र बाढीपीडितहरूको न्याय सुनिश्चित गर्ने उद्देश्य राखेको थियो ।
अध्यक्ष ह्योल्मोले आफू मेलम्ची खानेपानीको बोर्ड सदस्यको हैसियतमा समेत उक्त सम्झौतामा हस्ताक्षर गरेको स्मरण गराउँदै भने, ‘राज्यले गर्न सक्दैन भने किन सम्झौता गर्‍यो ? मन्त्री स्वयं आएर यसो गर्छौं, उसो गर्छौं भनेर सम्झौता गरेपछि त कार्यान्वयन गर्नुपर्छ नि ।’

प्रकाशित मिति : २१ कार्तिक २०८२, शुक्रबार २१:०५   :  बजे

75
Shares

अनलाइनपाना डटकममा प्रकाशित सामग्रीबारे कुनै सूचना, गुनासो, तथा सुझाव भए हामीलाई onlinepana@gmail.com मा लेखी पठाउनुहोला ।