पौडेलको पक्षमा बनेन सहमति, सभापतिमा जिताउन गरे आग्रह

नेपाली कांग्रेसको संस्थापन इतरमा रहेका नेताहरुले एक इतरमा एकजना मात्र सभापतिको उम्मेदवार उभ्याउँछौं भनेको भएता पनि बरिष्ठ नेता रामचन्द्र पौडेलको पक्षमा भने सहमति गर्न नसक्ने अवस्था देखिएको छ । आफ्नो नाममा सहमति बन्ने नदेखेपछि पौडेलले १४ औं महाधिवेशनमा आफूलाई सभापतिमा सघाउन इतर पक्षका नेताहरुलाई आग्रह गरेका छन् ।

आफूलाई सभापतिमा सघाए अरु नेताहरुलाई पदाधिकारीमा समेटेर अघि बढ्ने उनको भनाइ थियो । तर सभापतिका दाबेदार प्रकाशमान बाहेक सहभागी बैठकमा अधिकांशले उनको आग्रह नस्वीकारेको बैठकपछि एक नेताले जानकारी दिए । पौडेलको प्रस्तावमा नेताहरु अर्जुननरसिंह केसी, रामशरण महत र बलबहादुर केसी सकारात्मक जस्तो बनेपछि उनीहरुले सघाउन सकिनेबारे खुलेर भने केही नभनेको ती नेताको भनाइ छ ।

रामचन्द्र समूहबाट सभापतिमा एकल उम्मेदवारी तय गर्नका लागि सहमति जुटाउने प्रयास आकांक्षी नेताहरुबीच अनुपम फुडल्याण्डमा छलफल भएको थियो । बुधबार दिउँसो साढे २ बजेदेखि पौने ५ बजेसम्म चलेको बैठकमा एकल उम्मेदवार तय गर्नेबारे सहमति जुट्न नसकेको बताइएको छ ।