Logo

कर्पोरेट फोकस

नबिल बैंकको नाफा ४१ ले प्रतिशत वृद्धि



काठमाडौं । खुद ब्याज आम्दानी ६४ प्रतिशत बढेसँगै नबिल बैंकको नाफा ४१।३ प्रतिशत उक्लिएको छ । बैंकले चालु आर्थिक वर्षको पहिलो त्रैमासमा १ अर्ब ५७ करोड रुपैयाँ खुद नाफा कमाएको वित्तीय विवरण सार्वजनिक गरेको छ ।

पोहोर यही अवधिमा बैंकको नाफा १ अर्ब ११ करोड रुपैयाँ थियो । नबिलले नेपाल बंगलादेश बैंकलाई गाभेपछि एकीकृत नाफा निकालेको हो । गत आवको अन्त्यसम्म नबिलको नाफामा एनबी बैंकको नाफा जोडिएको थिएन ।

एनबी बैंकको नाफा जोडिदा नबिलको वितरणयोग्य मुनाफाले पनि छलाङ मारेको छ । हाल बैंकसँग २ अर्ब ९१ करोड रुपैयाँ वितरणयोग्य नाफा छ ।

विशेष गरी झन्डै एक प्रतिशतले बैंकको स्प्रेड दर बढेपछि खुद ब्याज आम्दानीले छलाङ लिएको हो । बैंकले असोज अन्त्यसम्म ३ अर्ब ६७ करोड रुपैयाँ खुद ब्याज आम्दानी गरेको छ । यस्तै, फी तथा कमिसन आम्दानी पनि ह्वात्तै बढेको छ। ४० प्रतिशतको वृद्धि देखिन्छ ।

यस अवधिमा बैंकको निक्षेप संकलन र कर्जा परिचालन दुवै सुस्त छन् । मर्जरको असर बैंकको प्रोभिजनिङमा देखिन्छ । प्रोभिजनिङ ह्वात्तै बढेको छ । करिब एक अर्ब रुपैयाँ बैंकले प्रोभिजनिङका लागि छुट्याएको छ । विशेषगरी नबिलको आफ्नो भन्दा एनबी बैंक तर्फबाट यो बढेको हो ।

बैंकको प्रति सेयर आम्दानी भने घटेको छ । मर्जरका कारण जुन अनुपातमा चुक्ता पुँजी बढ्यो नाफा सोही अनुपातमा नाफा नबढ्दा प्रति सेयर आम्दानी घटेको हो । अहिले बैंकको प्रति सेयर आम्दानी साढे २७ रुपैयाँ पुगेको छ। यस्तै, नेटवर्थ पनि घटेर २३३ रुपैयाँमा सीमित छ ।

प्रकाशित मिति : ७ कार्तिक २०७९, सोमबार १७:२६   :  बजे

0
Shares

अनलाइनपाना डटकममा प्रकाशित सामग्रीबारे कुनै सूचना, गुनासो, तथा सुझाव भए हामीलाई onlinepana@gmail.com मा लेखी पठाउनुहोला ।