काठमाडाैं । राष्ट्रपति रामचन्द्र पौडेलले वर्षा र सहकालका देवता रातो मच्छिन्द्रनाथको भोटो जात्रा अवलोकन गरेका छन् । राष्ट्रपति पौडेलले जावलाखेलमा आज अपराह्नमा आयोजित भोटोजात्रामा सरिक भइ भोटोजात्रा अवलोकन गरेका हुन ।
मच्छिन्द्रनाथको रथ लगनखेलबाट जावलाखेल पु¥याइएको चौथो दिन भोटो देखाउने परम्पराअनुसार आज राष्ट्रपति रामचन्द्र पौडेलको उपस्थितिमा गुठी संस्थान ललितपुरका कर्मचारीले भोटो देखाए । सो अवसरमा राष्ट्रपति पौडेलले रातो मच्छिन्द्रनाथको दर्शन गर्नुका साथै प्रसाद ग्रहण गरे । उनले जीवित देवी कुमारीको दर्शन पनि गरे । गत वैशाख ११ गतेदेखि सुरु भएको रथ जात्रा आज भोटो देखाएसँगै यस वर्षका लागि जात्रा सम्पन्न भएको छ ।
भोटोजात्रा अवलोकन गर्न उपराष्ट्रपति रामसहायप्रसाद यादव, प्रधानमन्त्री पुष्पकमल दाहाल ‘प्रचण्ड’, सभामुख देवराज घिमिरे, उपप्रधानमन्त्री एवं गृहमन्त्री नारायणकाजी श्रेष्ठ तथा मन्त्रीहरु सहभागी थिए । भोटोजात्रा हेर्न आम नागरिकको उल्लेख्य उपस्थिति थियो ।
भोटो जात्राको अघिल्लो दिन पुल्चोकको पाटीमा पकाइएको भातलाई रातो मच्छिन्द्रनाथको रथ वरपर छर्ने चलन छ । हिजो राती भात छरियो । कुनै समयमा जावलाखेल चौरमा भात छर्ने चलन थियो । हरेक १२ वर्षमा बुँगमतिबाट रथजात्रा सुरु गरिन्छ । १२ वर्षमा बुँगमतिमा पनि भोटो देखाउने चलन छ । २०७२ सालमा बुँगमतिबाट १२ वर्षे रथ तानिएको थियो । किसान र ख्याक अर्थात भूतबीच भोटो विवाद भएपछि प्रमाण लिएर आउनेलाई सो उपलब्ध गराउने भन्ने किम्बदन्ती छ ।
प्रतिक्रिया