Logo

समाचार

पिसिओडी भएका महिलाको गर्भधारणमा कस्तो असर पर्छ ?



काठमाडाैं । पिसिओडी अर्थात ‘पोलिस्टिक ओभरियन डिजिज ।’ यसलाई मेडिकल भाषामा ‘पोलिसिस्टिक ओभेरियन सिन्ड्रोम’ (पिसिओडी) भनिन्छ ।

महिलाहरुमा सेक्स हार्मोनको असन्तुलनको कारण अण्डाशयमा सानो–सानो गाँठ या सिस्ट बन्न जान्छ । सिस्टको आकार सानोमा केराउको जस्तो र ठूलोमा सुन्तला जस्तो हुन्छ । जसकारण महिलाको मासिक धर्मको साथै प्रजनन क्षमतामा पनि यसको असर पर्दछ, जसलाई पिसिओडी भन्ने गरिन्छ।

पिसिओडी १५ देखि ४९ वर्षका महिलाहरुमा सबैभन्दा धेरै देखिने ग्रन्थी सम्बन्धी समस्या हो । धेरैको बुझाइमा पिसिओडी भएका महिलाहरुले गर्भधारण गर्न सक्दैनन् भन्ने बुझाइ रहेको छ । पिसिओडी भएका महिलाहरुले गर्भधारण गर्न सक्दैनन् भन्ने बुझाइ गलत रहेको छ ।

पिसिओडी भएका महिलाहरुले गर्भधारण गर्न सक्छन्। तर अरु सामान्य महिलाहरुमा भन्दा पिसिओडीको समस्या भोगिरहेका महिलाहरुको केसमा थोरै जटिलता भने हुनसक्छ । जसले गर्दा महिनावारीमा गडबडी भने आउने हुन्छ ।

पिसिओडी हुदाँ कस्ता लक्षणहरु देखिन्छन् त ?

महिनावारी गड्बड हुनु ।

शरीर मोटाउनु या तौल बढ्नु ।

डिम्बाशयमा थुप्रै पानीका फोकाहरु देखिनु ।

टाउकोको कपाल झर्नु ,अनावश्यक ठाउँहरूमा कपाल आउनु ।

बाँझोपनकाे समस्या हुनु ।

पिसिओडी के कारणले हुन्छ ?

पिसिओडी यही कारणले हुन्छ भनेर एकिनका साथ अहिलेसम्म भन्न सकिएको छैन । तर केही कारणहरु भने देखापरेका छन् । जसमा पारिवारीक समस्याले चिन्तित हुने हुन्छ ।

यो वंशानुगत पनि हुनसक्छ । यसमा अझैपनि अध्ययन भइरहेको हुँदा कारण यहि मात्र हो भनी भन्न सकिने अवस्था छैन ।

पिडिओडीले निम्त्याउने समस्या के के हुन् ?

मानसिक स्वास्थ्यमा समस्या आउनु ।

बाँझोपन र गर्भपतन हुनु ।

पाठेघरको भित्रितहको क्यान्सर हुनु ।

डायविटिज हुनु ।

उच्चरक्तचाप हुनु ।

रगतमा चिल्लो पदार्थको मात्रा बढी हुनु ।

पिसिओडीको उपचार निर्मूल हुन्छ ?

‘यसको उपचार हुन्छ तर, यो समस्या निर्मूल भने हुँदैन ।महिलाहरु अस्पतालमा आउँदा उसका लक्षणहरु हेरेर उपचार गरिन्छ । यसमा सबै महिलामा उही लक्षहरु हुन नै भन्ने हुँदैन ।’

पिसिओडीको समस्या आउन नदिन के गर्ने ?

स्वस्थ खानपानको बानी बसाउनु पर्छ । बजारको खानेकुरा नखाने र प्लास्टिकको भाडोमा खानेकुरा नखाने गर्नुपर्छ । साथै उचाइ अनुसारको तौल राख्नुपर्छ । हरेक दिन आधा घण्टा जति व्यायम गर्नुपर्छ । यी सबै कुरामा ध्यान दिए पिसिओडीबाट बच्न सकिन्छ ।

-याे सामाग्री स्त्री तथा प्रसूति राेग विशेषज्ञ प्रियंका त्रिपाठीसँग गरिएकाे कुराकानीका आधारमा तयार पारिएकाे हाे ।

प्रकाशित मिति : जेष्ठ ७, २०८१ सोमबार  ३ : १७ बजे

63
Shares

अनलाइनपाना डटकममा प्रकाशित सामग्रीबारे कुनै सूचना, गुनासो, तथा सुझाव भए हामीलाई [email protected] मा लेखी पठाउनुहोला ।