काठमाडौँ । नेपाली कांग्रेसका केन्द्रीय सदस्य अर्जुन नरसिंह केसीले गत भदौ २३ र २४ गते भएको जेनजी आन्दोलनका माग जायज भएको बताएका छन् ।
पार्टी केन्द्रीय कार्यालय सानेपामा जारी केन्द्रीय कार्यसमिति बैठकमा बिहीबार धारणा राख्दै केन्द्रीय सदस्य केसीले जेनजी आन्दोलनलाई न्यायोचित मागहरूको प्रतिक भन्दै, सुशासन र भ्रष्टाचारविरुद्ध युवाहरूको आवाजलाई पूर्ण समर्थन गर्न कांग्रेसले नीतिगत प्रतिबद्धता जनाउनुपर्ने बताए ।
अहिले देश गृहयुद्ध उन्मुख असाधारण परिस्थितिमा पुगेको भन्दै यस्तो सङ्कट समाधानका लागि कांग्रेसले समग्र राजनीतिक, शासकीय र नैतिक सुधारको नेतृत्व लिनुपर्ने केसीले बताए ।
‘देश अहिले सत्ता, स्वार्थ र दलतन्त्रको दलदलमा फसेको छ । लोकतन्त्र दलतन्त्रमा, दलतन्त्र नेतातन्त्रमा, नेतातन्त्र गिरोहतन्त्र र अन्ततः विचौलियातन्त्रमा परिणत भएको छ,’ केसीले भने– ‘यसको अन्त्य गर्न कांग्रेसले नेतृत्व लिनुपर्छ ।’
केसीले विगतका ठुला भ्रष्टाचार प्रकरणहरूमा कारबाही गर्न पूर्व प्रधानन्यायाधीशको अध्यक्षतामा उच्चस्तरीय न्यायिक आयोग गठन गर्न पार्टीले पहल लिनुपर्ने बताए । अवैध सम्पत्ति राष्ट्रियकरण र पाँच सय र हजारका नोटहरू बन्देज गर्नुपर्ने सुझाव केसीको छ ।




















प्रतिक्रिया