कता छन् ठूलो माछा भन्दै अख्तियार अगाडि प्रद्धर्शन गर्ने विवेकशीलका कार्यकर्ता पक्राउ

अख्तियार दुरुपयोग अनुसन्धान आयोगको केन्द्रीय कार्यालय अगाडि प्रद्धर्शन गर्ने विवेकशील साझा पार्टीका कार्यकर्ताहरुलाई प्रहरीले पक्राउ गरेको छ ।

बढ्दो भ्रष्टाचार तथा बेथितिको छानबिनको माग गर्दै बुधबार बिहान विवेकशील साझाले अख्तियार अगाडि धर्ना कार्यक्रम राखेको थियो ।

‘ठूलो माछा कता छन् ? सिंहदरबार जता छन्’, ‘अख्तियारको बल्छी, साना माछा मात्रै पर्ने’ खालका नारा लेखिएका प्लेकार्डसहित विवेकशीलका कार्यकर्ताले धर्ना दिएपछि प्रहरीले उनीहरुलाई पक्राउ गरेको हो ।

प्रहरीले अख्तियार अगाडि धर्ना तथा नारावाजी गरेर अवरोध गरेपछि प्रदर्शनकारीहरुलाई नियन्त्रणमा लिएको जनाएको छ । नियन्त्रणमा लिइएकाहरुको संख्याबारे भने खुलाएको छैन ।