एकलौटी ढंगबाट क्रियाशील सदस्यता वितरण गरी गराइएको जिल्ला अधिवेशन बदरको माग गर्दै गराएको अनसनमा बसेका नेपाली कांग्रेस डडेल्धुराका सभापति कर्ण मल्ल सहितका नेताहरुले अनसन स्थगित गरेका छन् ।
पार्टी कार्यालय सानेपामा जारी अधिवेशनको १४ औं दिनमा उपसभापति विमलेन्द्र निधिको आग्रहपछि उनीहरुले अनसन स्थगित गरेका हुन् ।
डडेल्धुराको मागप्रति आफू सकारात्मक भएको भन्दै उपसभापति निधिले यस बिषयमा आफूले सभापति शेरबहादुर देउवासँग मौखिक र लिखित रुपमै पुनः वडा अधिवेशन गर्न आग्रह गरेको स्मरण गराए। यसबारे शुरुमा सभापति देउवा सकारात्मक भए पनि कार्यान्वयन नभएको उल्लेख गरे ।
जिल्लाबाट सिफारिस भएर आएका क्रियाशील सदस्यको नाम काटेर केन्द्रबाट सिधैं नाम थपेपछि विवाद उत्पन्न भएको हो। नेता निधिले सदस्यता छानवीन नगरी निर्वाचन प्रकृया अघि बढाउनु बिडम्बनापूर्ण भएको बताए ।
निर्वाचन समितिका सदस्यहरुबीच सहमतिका आधारमा निर्णय गर्नुपर्नेमा अल्पमत र बहुमतका आधारमा निर्णय हुनु दुःखद भएको निधिको भनाई थियो । आफ्ना मुद्धाहरुलाई पार्टीका बिभिन्न फोरममा राख्दै १४ औं महाधिवेशन सफलतापूर्बक सम्पन्न गराउनका लागि अनशन स्थगित गर्न निधिले आग्रह गरेका थिए। उनले डडेल्धुरा कांग्रेसको मागप्रति ऐक्यवद्धता जनाए ।
क्रियाशील सदस्यता विवादपछि डडेल्धुरामा जारी ११ दिनको अनशनपछि सभापति मल्लसहितका नेताहरु काठमाडौं आएर अनशन बसेका हुन् ।





















प्रतिक्रिया