Logo

प्रमुख समाचार

नेता केशरबहादुर विष्टमाथि भएको आक्रमणको कांग्रेस पार्टीद्वारा निन्दा



सल्यान । कांग्रेसका सल्यान जिल्ला सभापति केशरबहादुर विष्टमाथि भएको आक्रमणको नेपाली कांग्रेसले एक विज्ञप्ति जारी गरी निन्दा गरेको छ ।

कांग्रेसले विज्ञप्तिमार्फत घटनाका दोषीलाई कडा कारबाही गर्न माग गरेको छ ।

सभापति केशबहादुर विष्टमाथि चैत २९ गते राति सल्यानको वनगाड कुपिन्डे नगरपालिकाको बालुवासंग्रहीको एक होटलमा आक्रमण भएको थियो ।

प्रहरीले कुटपिट गर्ने पूर्वाधार विकास कार्यालय सल्यानका प्रमुख हरिबहादुर वलीलाई नियन्त्रणमा लिएर अनुसन्धान गरिरहेको छ । वलीले विष्टको हात टोक्नुका साथै वियरको बोतलले टाउकोमा प्रहार गरेका थिए ।

मेलमिलाप गर्नेगरी घटनालाई गुपचुप राखिए पनि सहमति हुन नसकेपछि विष्टले जिल्ला प्रहरी कार्यालय सल्यानमा जाहेरी दिएका थिए ।

जाहेरीका आधारमा पूर्वाधार विकास कार्यालयका प्रमुख वलीलाई नियन्त्रणमा लिइएको र थप अनुसन्धान भइरहेको सल्यानका प्रहरी प्रमुख डीएसपी नवीन कार्कीले जनाएका छन् ।

चैत २९ गते सल्यान प्रदेश सभा (ख) का सांसद सुरेश अधिकारीसहित सभापति विष्ट सुर्खेतबाट सल्यानतर्फ जाँदै गर्दा राति ९ बजे बालुवासंग्रहीको कृष्ण होटेलमा पुगेका थिए ।

पूर्वाधार विकास कार्यालयका प्रमुख वली, खानेपानी सिँचाई कार्यालय सल्यानका कार्यालय प्रमुख ज्वाला शाहीलगायतको समूह पनि त्यही होटलमा खानपिन गर्दै बसिरहेको थियो । दुवैबीच विवाद उत्पन्न भएपछि वलीले विष्टमाथि आक्रमण गरेका थिए ।

विष्टले पिकनिक गएर आएको कर्मचारीको टोलीले विवाद झिकेर आफूमाथि आक्रमण गरेको बताएका छन् भने वलीले आफ्नो प्रतिरक्षाका लागि विष्टमाथि आक्रमण गरेको दाबी गरेका छन् ।

विष्टको अहिले काठमाडौंमा उपचार भइरहेको छ ।

प्रकाशित मिति : ३ बैशाख २०८१, सोमबार १६:१२   :  बजे

273
Shares

अनलाइनपाना डटकममा प्रकाशित सामग्रीबारे कुनै सूचना, गुनासो, तथा सुझाव भए हामीलाई onlinepana@gmail.com मा लेखी पठाउनुहोला ।