नेपाल टेलिकमको फाइबर टु द होम (एफटीटीएच) इन्टरनेट सेवा ३९ जिल्लामा पुगेको छ । डेढ बर्षअघि बृहत कार्ययोजना बनाएर सुरु गरेको उक्त सेवा ३९ जिल्लामा पुगेको टेलिकमले जनाएको छ ।
टेलिकमका सहप्रवक्ता रन्जित लोहियाका अनुसार उक्त सेवा हाल तनहुँ, सुर्खेत, सुनसरी, सोलुखुम्बु, सिराहा, सिन्धुपाल्चोक, सुन्धुली, रुपन्देही, प्युठान, पर्वत, पर्सा, परासी, पाल्पा, नवलपुर, म्याग्दी, मुस्ताङ, मोरङ, नवलपरासी, ललितपुर, काभ्रे, काठमाडौँ र कास्कीका केही स्थानमा उपलब्ध रहेको छ । यसैगरी, कपिलवस्तु, कन्चनपुर, कैलाली, झापा, डोटी, दोलखा, धनुषा, धनकुटा, धादिङ, दाङ, दैलेख, डडेलधुरा, चितवन, भक्तपुर, बारा, बाँके, बाग्लुङ र अछाममा समेत टेलिकमको एफटीटीएच नेटवर्क पुगिसकेको छ ।
कम्पनीका अनुसार उपत्यका बाहिरको हकमा कम्पनीको फाइबर पुगेको स्थानमा उक्त सेवा उपलब्ध हुँदै आएको छ । सुरुआती चरणमा एउटै तारबाट (एफटीटीएच सेवाबाट) भ्वाइस र इन्टरनेट सेवा उपलब्ध हुँदै आएकोमा शुक्रबार (अंग्रेजी नयाँ वर्ष) बाट उक्त फाइबरमा एनटी टिभी सेवा थप भएको छ ।
एउटै तारबाट तीन छुट्टा छुट्टै सेवा प्रवाह गर्ने नेपालको पहिलो कम्पनी नेपाल टेलिकम रहेको सहप्रवक्ता लोहिया बताउँछन् । उनका अनुसार सुरुवाती चरणमा कम्पनीले काठमाडौँ उपत्यका भित्रका केही स्थान र काभ्रेको बनेपामा उक्त टिभी सेवा उपलब्ध गराएको छ । जसमा सुन्धारा, बबरमहल, ठिमी, बलम्बु, भक्तपुर, चाबहिल, छाउनी र गोंगबु, पाटन, हात्तिगौंडा, जोरपाटी, कीर्तिपुर, सैंबु, लुभू, नक्साल तथा उपत्यका बाहिर बनेपामा उपलब्ध गराईएको हो ।
कम्पनीको फाइबर पुगेको ३९ वटा जिल्लामा विस्तारै सेवा विस्तार गर्दै लैजाने तयारी गरेको जनाईएको छ ।
फाइबर टु द होम (एफटीटीएच) इन्टरनेट सेवाका ग्राहकहरु एक लाख बढी भएको लोहिया बताउछन्। उक्त सेवामा दिनप्रतिदिन ग्राहकहरुको आर्कषण बढ्दै गएको जनाईएको छ ।
प्रतिक्रिया