अनलाइनपाना बुलेटिन : देश-विदेशमा कहाँ के भयो ?

दिनभरका मुख्य समाचारहरु :

ढुंगा, गिट्टी, बालुवा निकासी गर्ने सरकारको निर्णयमा सर्वोच्चद्वारा रोक

ढुंगा, गिट्टी, बालुवा निकासी गर्ने सरकारको निर्णयमा सर्वोच्च अदालतले रोक लगाएको छ । सर्वोच्चले शुक्रबार ढुंगा, गिट्टी तथा बालुवा निकासी गर्ने निर्णय कार्यान्वयन नगर्न अन्तरिम आदेश जारी गरेको हो । प्रधानन्यायाधीश चोलेन्द्र शम्शेर राणा, न्यायाधीशहरू दीपककुमार कार्की, मीरा खड्का, हरिकृष्ण कार्की र विश्वम्भरप्रसाद श्रेष्ठ सम्मिलित संवैधानिक इजलासले शुक्रबार अन्तरिम आदेश जारी गरेको हो ।

सरकारले आगामी आर्थिक वर्षका लागि ल्याएको बजेटको बुँदा नम्बर १९९ मा व्यापार घाटा कम गर्नका लागि गिट्टी बालुवा निकासी गर्ने उल्लेख गरिएको थियो । यो व्यवस्था उत्प्रेष्णको आदेशद्वारा बदर गर्न माग गर्दै सर्वोच्चमा सातवटा रिट दर्ता भएका थिए । वरिष्ठ अधिवक्ता दिनेश त्रिपाठी, अधिवक्ताहरु शैलेन्द्र प्रसाद अम्वेडर, रामबहादुर शाही, पुण्यप्रसाद खतिवडा, हरिराम वलजु, अतिस कार्की र विक्रम नगरकोटीले छुट्टाछुट्टै रिट दायर गरेका थिए । 

गण्डकी प्रदेशका मुख्यमन्त्री पोखरेलले पाए विश्वासको मत, पक्षमा ३१ र विपक्षमा २७ मत

गण्डकी प्रदेशका मुख्यमन्त्री कृष्णचन्द्र पोखरेलले प्रदेश सभामा विश्वासको मत प्राप्त गरेका छन् । मुख्यमन्त्री पोखरेलले प्रदेश सभा बैठकमा संविधानको धारा १६८ को उपधारा ६ बमोजिम विश्वासको मतसम्बन्धी राखेको प्रस्ताव बहुमतले पारित भएको हो । मुख्यमन्त्री पोखरेलको पक्षमा ३१ मत परेको छ भने २७ मत मत परेको छ । ५९ जना प्रदेश सभा रहेको गण्डकीमा विश्वासको मत प्राप्त गर्नका लागि ३० मत आवश्यक पर्छ ।

प्रदेश सभामा शुक्रबार ५८ प्रदेशसभा सदस्यहरुले मतदान गरेका थिए । ६० प्रदेश सभा सदस्य रहेको गण्डकीमा राष्ट्रिय जनमोर्चाले पार्टीका नेता कृष्णकुमार तामाङलाई यसअघि नै कारबाही गरेको थियो । पृथ्वीसुब्बा गुरुङले जेठ २७ गते विश्वासको मत गुमाएपछि पोखरेल जेठ २९ गते मुख्यमन्त्रीमा नियुक्त भएका थिए । उनलाई प्रदेश प्रमुख सीतकुमारी पौडेलले जेठ ३० गते मुख्यमन्त्री पोखरेललाई पोखरेललाई पद तथा गोपनीयताको शपथ ग्रहण गराएकी थिइन् । 

पार्टीको आधिकारिता दाबी गर्दै आयोगमा पुग्यो उपेन्द्र यादव समूह, ३० सांसद्को हस्ताक्षर

जनता समाजवादी पार्टीका अध्यक्ष उपेन्द्र यादव समूहले निर्वाचन आयोगसमक्ष पार्टीको आधिकारिकता माग गरेका छन् । पार्टी कार्यकारिणी समितिका बहुमत सदस्यले गरेको निर्णयसहित यादव समूह शुक्रबार निर्वाचन आयोग पुगेको हो । यादव समूहले निर्वाचन आयोगको पछिल्लो निर्णयले पार्टी संगठन सञ्चालनमा बाधा पुगेको भन्दै आधिकारिकता आफूलाई दिन माग गरेको हो । यादव समूहले दलको विधान, संविधान र राजनीतिक दलसम्बन्धी कानुनअनुसार आधिकारिकता दाबी गरेको भन्दै त्यसमा निर्णय गरिदिन माग गरेको हो ।

यसअघि निर्वाचन आयोगले उपेन्द्र यादव समूहले महन्थ ठाकुर, राजेन्द्र महतो, लक्ष्मणलाल कर्ण र सर्वेन्द्रनाथ शुक्ललाई गरेको कारबाहीसम्बन्धी विवरण अद्यावधिक गर्न अस्वीकार गरेको थियो । त्यस्तै, ठाकुर पक्षले उपेन्द्र यादवलाई पार्टीबाट निष्कासन गरेको निर्णयलाई पनि मान्यता दिएको थिएन । आयोगको उक्त निर्णयले पार्टीमा विवाद निरुपण नभएकाले कार्यकारिणीको बहुमतले आधिकारिकता दाबी गर्ने निर्णय भएको यादवले बुझाएको पत्रमा लेखिएको छ ।

एमाले र माओवादीका नेता पनि पालैपालो पुगे निर्वाचन आयोग, पार्टी छोडेकालाई दल त्याग गरेको सूचना निकाल्न माओवादी नेताको माग

एमाले र माओवादीका नेताहरु पालैपालो निर्वाचन आयोग पुगेका छन् । माओवादी छोडेर एमाले बनेका नेता र माओवादीकै नेताहरु शुक्रबार निर्वाचन आयोग पुगेका हुन् । माओवादी पृष्ठभूमिका एमाले नेताहरुले निर्वाचन आयोग पुगेर आसन्न निर्वाचनबारे आयोग पदाधिकारीसँग छलफल गरेलगत्तै माओवादी नेताहरु निर्वाचन आयोग पुगेका हुन् । माओवादी नेताहरुले स्थानीय तहमा आफ्नो पार्टी छोडेकाहरूलाई दल त्याग गरेको सूचना प्रकाशित गर्न आयोगलाई ध्यानाकर्षण गराएका छन् ।

माओवादी छाडेर एमाले बनेका टोपबहादुर रायमाझी र प्रभु शाह आयोग पुगेर आयोग पदाधिकारीसँग छलफल गरेका हुन् । उनीहरु आयोगबाट निस्के लगत्तै माओवादी केन्द्रका नेता लीलामणि पोखरेल र दिनानाथ शर्मा लगायतको टोली पनि पनि निर्वाचन आयोग पुगेर आयोग पदाधिकारीसँग छलफल गरेका छन् । माओवादी नेताले स्थानीय तहमा पार्टी छोडेर अन्यत्र गएकाहरुलाई पार्टीले कारवाही गरेको छ । कारबाहीमा परेकाहरुलाई दल त्याग गरेको सूचना प्रकाशित गर्न ओयोगलाई आग्रह गरेका छन् । 

कर्णाली सरकारमा सहभागी तीनजना मन्त्रीलाई राजीनामा दिन नेकपा एमालेको निर्देशन   

नेकपा एमाले कर्णाली प्रदेश संसदीय दलको बैठकले नेकपा माओवादी केन्द्र नेतृत्वको सरकारका सहभागी तीन मन्त्रीलाई तत्काल पदबाट राजीनामा दिन निर्देशन दिएको छ । पार्टी ह्विप विपरीत फ्लोर क्रस गरेका नेता प्रकाश ज्वालासहित शुक्रबार बसेको दलको बैठकले तीन मन्त्रीलाई राजीनामा दिन निर्देशन दिएको हो । गत वैशाख ३ गते एमाले प्रदेशसभा सदस्य ज्वालासहित अम्मरबहादुर थापा, कुर्मराज शाही र नन्दसिंह बुढाले माओवादी केन्द्रका नेता मुख्यमन्त्री महेन्द्रबहादुर शाहीलाई विश्वासको मत दिएर फ्लोर क्रस गरेका थिए ।

फ्लोर क्रस गरेपछि एमालेले प्रदेशसभा सदस्य र पार्टीको साधारण सदस्य नरहने गरी उनीहरु चार जनालाई निष्कासन गरेको थियो । सर्वोच्च अदालतले एमाले संसदीय दलकै सदस्यका रुपमा काम गर्न दिनू भन्ने अन्तरिम आदेश दिएपछि उनीहरु पुनस्र्थापित भएका हुन् । दलका नेता यामलाल कँडेलको अध्यक्षतामा बसेको बैठकले मन्त्रीत्रय भौतिक पूर्वाधार तथा शहरी विकासमन्त्री थापा, भूमि व्यवस्था, कृषि तथा सहकारीमन्त्री शाही र उद्योग, पर्यटन, वन तथा वातावरणमन्त्री बुढालाई राजीनामा दिएर प्रतिपक्षी भूमिकामा बस्न निर्देशन दिएको हो । 

अबको दुई महिनापछि पनि मेलम्चीको पानी काठमाडौं नआउने, बढ्यो अन्योलता

दुई महिनाका लागि वितरण रोकिएको भनिएको मेलम्चीको पानी काठमाडौं बासीले पाउने अझ धेरै समय लाग्ने भएको छ । मेलम्ची खानेपानी आयोजनाले दुई महिनाका लागि रोकिएको भनिएको वितरण दुई महिनाको अवधिमा पनि आउनेमा अन्योलता बढेको हो । मेलम्ची खानेपानी आयोजनाको उद्घाटन गर्ने हतारोमा गरिएको गल्तीका कारण पानी आउने समय बढी लाग्ने भएको छ । सुरुङमार्गको परीक्षण कार्यविधि पूरा गर्न सुरुङमा असारदेखि पानी पठाउन बन्द गरिएको छ ।

असार १ देखि पानी भर्न बन्द गरे पनि १५ दिन सुरुङको पानी खाली गर्न समय लाग्ने र त्यसपछि विज्ञ र प्राविधिकले सुरुङभित्र गएर अवस्थाको अध्ययन गर्ने भएकोले करिब दुई महिनामा पानी नआउने आयोजनाका प्रवक्ता राजेन्द्र पन्तले जानकारी दिएका थिए । तर, यी काम समयमै नहुने भएपछि पानी वितरणको काम अनिश्चित भएको हो । यो काम काठमाडौंमा खानेपानी वितरण सुरु गर्नुअघि नै गर्नुपर्ने भए पनि उद्घाटनको हतारोका कारण काम पछि सारेर सुरुङ परीक्षणविनै पानी पठाइएको थियो । मेलम्चीको १० फागुनमा सुरुङमा पानी भर्न थालिएको थियो । साढे २६ किलोमिटर लामो सुरुङ भरिएपछि फागुन २२ गते सुन्दरीजलमा खसालिएको थियो । सुरुङबाट सफा पानी आउन थालेपछि वितरण केन्द्रबाट पानी प्रशोधन गरेर चैत १५ गतेबाट वितरण लाइनमा पठाउन थालिएको थियो ।

पछिल्लो २४ घण्टामा दुई हजार ७६८ कोरोना संक्रमित थपिए, चार हजार २० संक्रमणमुक्त  

पछिल्लो २४ घन्टामा दुई हजार ७६८ जना कोरोना भाइरस संक्रमित थपिएका छन् । देशभरका विभिन्न प्रयोगशालामा परीक्षण गराएका १३ हजार ३७ नमूनामध्ये दुई हजार ७६८ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । यस्तै पछिल्लो २४ घन्टामा चार  हजार २० जना संक्रमणमुक्त भएका छन् ।

यही अवधिमा देशभर ४४ जनाको कोरोना संक्रमणबाट मृत्यु भएको छ । देशभर हालसम्म कोरोना संक्रमितको संख्या ६ लाख १७ हजार ९४७ पुगेको छ । हालसम्म आठ हजार ६४१ कोरोना संक्रमितको मृत्यु भएको छ । 

सोमबारदेखि बैंकहरु पूर्णरुपमा खुला गर्ने बैंकर्स संघको निर्णय

कोरोना संक्रमणले गर्दा झन्डै दुई महिना खुम्चिएको बैंक तथा वित्तीय संस्थाको सेवा असार ७ गते सोमबारदेखि भने पूर्ण रूपमा सञ्चालनमा आउने भएको छ । नेपाल बैंकर्स संघकोे बिहीबार सम्पन्न कार्यसमितिको बैठकले बैङकिङ कारोबार खुला गर्ने सहमति भएको हो ।

संघका कार्यकारी निर्देशक अनिल शर्माका अनुसार स्थानीय प्रशासनको निर्देशनलाई हेरेर बैंकहरूलाई पूर्ण रूपमा चलाउने निर्णय भएको हो । सरकारले पछिल्लो समय असार ७ गतेसम्म निषेधाज्ञा थप  गरे पनि खुकुलो बनाएको छ ।  अहिले  निषेधाज्ञा  कारण  शाखाहरू  पनि  आलोपालो छ भने निक्षेप झिक्ने  र राख्ने सेवा मात्र छ । 

नयाँ विशेषता थप गर्दै फेसबुक, टिकटकमा ३ मिनेटसम्मको भिडियो राख्न पाइने

विश्वभरी लोकप्रिय सामाजिक सञ्जाल फेसबुकले नयाँ विशेषता थप्ने तयारी भएको छ । फेसबुकले अडियो सामग्री बज्ने सुविधा थप्ने लागेको जनाएको छ । फेसबुकमा यो सेवा आगामी जुन २२ देखि सुरु हुने जनाइएको छ । कम्पनीका अधिकारीहरुका अनुसार अप्रिलमा नै नयाँ विशेषताका बारेमा परीक्षण गरिएको थियो । परीक्षणबाट नतिजा सकारात्मक आएपछि अहिले पुरै तयारीका साथ जोड्न थालिएको हो । पोडकास्ट सेवा जोडिएपछि फेसबुक एपमा नै सिधै अडियो सामग्रीहरु सुन्न मिल्ने भएको फेसबुकले जनाएको छ । 

त्यसैगरि पछिल्लो समय लोकप्रिय बनेको टिकटकले पनि एक मिनेटबाट बढाएर तीन मिनेटको भिडियो अपलोड गर्न मिल्ने बनाएको छ । सुरुमा टिकटकमा १५ सेकेण्डको मात्रै भिडियो पोस्ट गर्न मिल्ने बनाएको थियो । पछि यसको समय बढाएर एक मिनेटसम्म बनाइएको थियो ।  

गण्डकी र सुदूरपश्चिम प्रदेशमा आज राति वर्षाको सम्भावना, नदी तटीय क्षेत्रमा सतर्कता अपनाउन आग्रह 

देशको पश्चिमी भू–भाग नजिक मनसुन न्युन चापिय रेखा छ । शुक्रबार राति गण्डकी र सुदूरपश्चिम प्रदेशका एक वा दुई स्थानहरुमा मेघगर्जन, चट्टयाङसहित भारी वर्षाको सम्भावना रहेको जल तथा मौसम पूर्वानुमान महाशाखाले जनाएको छ ।

त्यसैगरि शनिबार पनि देशभर सामान्य देखि पूर्ण बदली रहने जनाइएको छ । प्रदेश १, गण्डकी प्रदेश, लुम्बिनी प्रदेशमा चट्टयाङसहित भारी वर्षाको सम्भावना रहेको जनाइएको छ । आगामी २४ घण्टामा देशका अधिकांश स्थानहरुमा मेघगर्जन र चट्याङसहित भारी वर्षा हुने सम्भावना रहेकोले उक्त प्रदेशहरुको पहाडी भू–भागमा पहिरो बाढीको जोखिम रहेको र नदीनालाको तटीय क्षेत्रमा सतर्कता अपनाउन मौसम पूर्वानुमान महाशाखाले आग्रह गरेको छ ।