Logo

विभिन्न ठाउँमा बाढी तथा पहिरोले घरहरू डुबानमा, धनमाल क्षति तथा सडक अवरोध



कञ्चनपुर : भिमदत्त नगरपालिका-१२ ऐरीमा शनिबार बेलुका अबिरल बर्षाको कारण महाकाली नदीको बाहव बढी सोही ठाउँ बस्ने मनोज सुनाह लगायत ६ जनाको घर डुबानमा परेका छन् । ईलाका प्रहरी कार्यालय गड्डाचौकीबाट खटिएको प्रहरीले मानिसहरुलाई सुरक्षित स्थानमा सारेको छ । 

त्यसैगरी, बाजुरा स्वामीकार्तिक खापर गाउँपालिका-१ स्थित मुक्तिकोट बस्ने धनरुप कामीको घर शुक्रबार बेलुका पहिरोले पुरेको छ । साथै सोही ठाउँ बस्ने अन्य ७ जना व्यक्तिहरूको घर, गोठ अविरल वर्षाले क्षति भएको छ । 

दार्चुला, ब्याँस गाउँपालिका-३ तुसारपानी बस्ने पहिरोको जोखिममा रहेका १५ घर परिवारहरुलाई शनिबार दिउँसो  प्रहरी चौकी धौलाकोटबाट खटिएको सम्पूर्ण सर-सामान सहित सोही ठाउँस्थित गल्फा भन्ने स्थानमा सारेको छ । अविरल वर्षाका कारण पहिरोको उच्च जोखिममा रहेका उनीहरूलाई सुरक्षित स्थानमा सारिएको हो । 

बझाङ, बित्थडचिर गाउँपालिका-४ मेल्टास्थित जयपृथ्वी राजमार्गमा आइतबार बिहान पहिरो खस्दा सडक अवरोध भएको छ । प्रहरी बेस देउलेखबाट खटिएको प्रहरीले सडक खुलाउन आवश्यक पहल गरिरहेको छ । 

बैतडी, दोगडाकेदार गाउँपालिका-५ ढिग्गाडस्थित महाकाली लोकमार्गमा आइतबार बिहान पहिरो खस्दा सडक अवरोध भएको छ । प्रहरी चौकी खोचलेकबाट खटिएको प्रहरीले सडक खुलाउन आवश्यक पहल गरिरहेको छ । 

प्रकाशित मिति : असार ५, २०७८ आईतबार  १ : ४८ बजे

0
Shares

अनलाइनपाना डटकममा प्रकाशित सामग्रीबारे कुनै सूचना, गुनासो, तथा सुझाव भए हामीलाई [email protected] मा लेखी पठाउनुहोला ।