नारायणी डेभलपमेन्ट बैंक लिमिटेडले अवितरित हकप्रद सेयर लिलामी बढाबढ प्रक्रियामार्फत बिक्री गर्ने भएको छ। बैंकले मंसिर ११ गतेदेखि आवेदन दिन मिल्ने व्यवस्था गर्दै संस्थापक तथा सर्वसाधारण समूहका हकप्रद सेयर लिलामीमा राखेको जनाएको छ।
बैंकका अनुसार संस्थापक समूहतर्फ ६ लाख ३ हजार १६२ कित्ता र सर्वसाधारण समूहतर्फ १८ हजार ४४४ कित्ता सहित कुल ६ लाख २१ हजार ६०६ कित्ता हकप्रद सेयरमा माग नपरेपछि लिलामीमा लैजाने निर्णय गरिएको हो। हकप्रद सेयरको न्यूनतम मूल्य अंकित मूल्यअनुसार प्रतिकित्ता १०० रुपैयाँ तोकिएको छ।
लिलामीमा सहभागी हुन इच्छुक व्यक्ति, संस्था वा कम्पनीले तोकिएको दरमा बोलपत्र पेश गर्न सक्नेछन्। बोलपत्र काठमाडौँको नक्सालस्थित ग्लोबल आइएमई क्यापिटलको कार्यालयमा बुझाउन मिल्नेछ। साथै ग्लोबल आइएमई बैंकका विराटनगर, वीरगञ्ज, हेटौंडा, नारायणगढ, पोखरा, बुटवल, सुर्खेत र धनगढी शाखाले पनि बोलपत्र बुझ्ने व्यवस्था मिलाइएका छन्। बोलपत्र बुझाउने अन्तिम मिति मंसिर २५ निर्धारण गरिएको छ।
गत असोज २ गतेदेखि कात्तिक ९ गतेसम्म हकप्रद सेयर बिक्री खुला गरिएको थियो। निर्धारित अवधिमा मागअनुसार आवेदन नआएपछि बैंकले बचेका सेयरलाई लिलामी प्रक्रियाबाट बिक्री गर्ने तयारी गरेको हो। बैंकले लिलामी प्रक्रियाबाट हकप्रद पूँजी संरचना सुदृढ गर्दै आगामी विस्तार योजना तथा वित्तीय क्षमता थप मजबुत बनाउने अपेक्षा गरेको छ।
लिलामीमा भाग लिन इच्छुक लगानीकर्तालाई आवश्यक कागजातका साथ समयमा बोलपत्र बुझाउन बैंकले अनुरोध गरेको छ। यस प्रक्रियाबाट सेयर आमनागरिक तथा संस्थागत लगानीकर्ताले प्रतिस्पर्धात्मक मूल्यमा प्राप्त गर्ने अवसर पाउनेछन्।




















प्रतिक्रिया