Logo

अर्थ

काठमाडौँ महोत्सव २०८२ माघ १४ देखि सुरु, १ लाखभन्दा बढी अवलोकनकर्ता अपेक्षित



नेपाल उद्योग वाणिज्य संघ काठमाडौँले “काठमाडौँ महोत्सव २०८२” आगामी माघ १४ देखि १७ गतेसम्म भृकुटीमण्डपस्थित प्रदर्शनी स्थलमा आयोजना गर्ने भएको छ। संघका अध्यक्ष दिनेश श्रेष्ठद्वारा जारी विज्ञप्तिमा महोत्सवलाई भव्य, व्यवस्थित र आकर्षक ढंगले सम्पन्न गर्न तयारी तीव्र भइरहेको उल्लेख छ।

महोत्सवमार्फत काठमाडौँ उपत्यकाको आर्थिक, सांस्कृतिक र पर्यटन पहिचानलाई थप मजबुत बनाउने, स्थानीय उत्पादन तथा नवप्रवर्तनलाई राष्ट्रिय–अन्तर्राष्ट्रिय स्तरमा प्रवद्र्धन गर्ने तथा उद्यमशीलता र स्टार्टअपलाई आवश्यक अवसर र दृश्यता प्रदान गर्ने उद्देश्य राखिएको छ।

करिब २०० अत्याधुनिक व्यवसायिक स्टल रहने महोत्सवमा स्थानीय उत्पादनका प्रदर्शनीसँगै रैथाने खानाको प्रतियोगिता, फुड–फेस्ट, कन्सर्ट, लाइभ म्युजिक, कला–संस्कृति प्रस्तुति, पर्यटन प्रवद्र्धन कार्यक्रम, फोटोग्राफी स्पट र स्वास्थ्य शिविरजस्ता गतिविधि समावेश हुनेछन्। आयोजकले १ लाखभन्दा बढी दर्शक उपस्थित हुने अपेक्षा गरेको छ।

महोत्सवले स्थानीय उत्पादनको बजार विस्तार, व्यापार तथा लगानी अवसर सिर्जना, व्यवसायिक नेटवर्किङ सुदृढीकरण, स्टार्टअप र नयाँ उद्यमीलाई प्रेरणा, रोजगारी प्रवर्द्धन तथा समग्र स्थानीय अर्थतन्त्रमा सकारात्मक प्रभाव पार्ने लक्ष्य लिएको संघले जनाएको छ।

व्यापारिक क्षेत्रमा कपडा तथा पहिरन, अटोमोबाइल, इलेक्ट्रोनिक्स र होम एप्लायन्स, हस्तकला, कृषि र मेसिनरी, फर्निचर, फूड एन्ड बेभरेज, सूचना प्रविधि, ट्राभल एन्ड टुर सेवा, रियल स्टेट, हर्बल तथा अर्गानिक उत्पादन, बैंक तथा वित्तीय संस्था लगायतका क्षेत्रका स्टलहरू रहनेछन्।

प्रकाशित मिति : २६ मंसिर २०८२, शुक्रबार ०८:४४   :  बजे

15
Shares

अनलाइनपाना डटकममा प्रकाशित सामग्रीबारे कुनै सूचना, गुनासो, तथा सुझाव भए हामीलाई onlinepana@gmail.com मा लेखी पठाउनुहोला ।