अनावश्यक नयाँ सामग्री खरिद नगर्न सरकारको निर्देशन

काठमाडौं। सरकारले अनावश्यक सामग्री खरिद नगर्न र भएसम्म मर्मत गरी काम गर्न सम्बन्धित सरकारी निकायलाई निर्देशन दिएको छ।

प्रधानमन्त्री तथा मन्त्रिपरिषद्को कार्यालयले सबै मन्त्रालय, आयोग, सचिवालय, कार्यालय एवम् निकायसँगै प्रदेशका मुख्यमन्त्री तथा मन्त्रिपरिषद्को कार्यालयलाई परिपत्र गरी निर्देशन दिएको हो।

आज जारी गरिएको पत्रमा भनिएको छ, ‘कार्यालय प्रमुख नियुक्ति, पदस्थापन र सरुवासँगै कार्यालयमा प्रयोगमा आइरहेका कुर्सी, दराज, सोफा, कार्पेट, पर्दा, गमला, कम्प्युटर, मोबाइल, ल्यापटप लगायतका सामग्रीहरू प्रयोग नगरी नयाँ खरिद गर्न लगाउने, सामान्य मर्मत गरी सञ्चालनमा ल्याउन सक्ने यन्त्र र उपकरण र सवारी साधनलाई मर्मत नगरी नयाँ खरिद गर्ने, ममर्तमा अस्वभाविक खर्च गरी राज्यकोषमा अत्याधिक भार सिर्जना गर्ने जस्ता कार्य भएको भनी व्यापक गुनासो आएकोले सो सम्बन्धमा कार्यालय प्रमुखहरूले अत्यावश्यक बाहेक नयाँ सामाग्रीहरू खरीद नगरी कार्यालयमा भइरहेका सामान र औजार उपकरण र फर्निचर र सवारी साधनहरूलाई चालु अवस्थामा राखी प्रयोग गर्ने र सार्वजनिक खर्चलाई मितव्ययी गर्नु गराउनु।’