Logo

प्रमुख समाचार

पूर्वमन्त्री नवीन्द्रराज जोशीले गरे वीर अस्पतालमा ‘गजेन्द्र स्मृति कोष’ स्थापना



नेपाली कांग्र्रेसका नेता एवं पूर्वमन्त्री नवीन्द्रराज जोशीले वीर अस्पतालमा १० लाख रुपैयाँको अक्षयकोष स्थापना गरेका छन् । नेता जोशीले आफ्ना स्वर्गीय पिता गजेन्द्रराज जोशीको स्मृतिमा शुक्रबार रु. १० लाख राशिको गजेन्द्र स्मृति कोष स्थापना गरेका हुन् ।

नेता जोशीकी आमा गीता जोशीले अस्पतालका कार्यकारी निर्देशक भूपेन्द्र बस्नेतलाई उक्त रकम हस्तान्तरण गरेकी छिन् ।

कार्यक्रममा नेता जोशीले अर्थभावका कारणले कुनै पनि बिरामी औषधि उपचारबाट वञ्चित हुन नपरोस् भन्नका लागि उक्त कोष स्थापना गरिएको जानकारी दिए । चिकित्सा विज्ञान राष्ट्रिय प्रतिष्ठान (न्याम्स)का उपकुलपति डा. सुबोध अधिकारीले कांग्रेस नेता जोशीले गरिब तथा असहायको उपचारका लागि गरेको सहयोग उदाहरणीय रहेको बताए ।

न्याम्सका रजिस्ट्रार डा. विश्वराज जोशीले उपचारका लागि आउने असहाय बिरामीलाई यस कोषबाट उपचारको व्यवस्था मिलाउने प्रतिबद्धता व्यक्त गरे । अस्पतालका कार्यकारी निर्देशक डा. बस्नेतले अक्षयकोषको सदुपयोग गर्ने र आगामी दिनमा यस्ता कोषलाई थप गर्दै लैजाने बताए ।

गजेन्द्रराज जोशी जिउँदो हुँदा नै शिक्षा क्षेत्रको विकासका लागि पर्सामा नेपाल राष्ट्रिय गीता–गजेन्द्रराज जोशी माध्यमिक विद्यालय स्थापना गरिएको उनका छोरा राजुराज जोशीले जानकारी दिए । गजेन्द्रराज जोशीको गत वर्ष माघ ५ गते ८२ वर्षको उमेरमा निधन भएको थियो ।

प्रकाशित मिति : फाल्गुन ३, २०७५ शुक्रबार  ५ : ०० बजे