काठमाडौं । आयोजना प्रभावित स्थानीले माउन्ट एभरेष्ट पावर डेभलपमेन्टको आइपीओ भर्ने आज वैशाख ३१ गते अन्तिम दिन रहेको छ।
माउन्ट एभरेष्ट पावर डेभलपमेन्टले यही वैशाख १७ गतेदेखि पहिलो चरणमा आयोजना प्रभावित स्थानीय र वैदेशिक रोजगारीमा रहेका नेपालीका लागि आइपीओ जारी गरेको थियो। आयोजना प्रभावितका स्थानीयले आज बैंकिङ समयसम्म आवेदन दिन पाउनेछन्। यो आइपीओ वैदेशिक रोजगारमा रहेका नेपालीका लागि वैशाख २३ गतेसम्म खुला गरिएको थियो।
कम्पनीले जारी पुँजी ८६ करोड रुपैयाँको ३० प्रतिशत अर्थात २५ करोड ८० लाख रुपैयाँबराबरको २५ लाख ८० हजार कित्ता शेयर बिक्री गर्ने अनुमति पाएको छ। त्यसमध्ये ८ करोड ६० लाख रुपैयाँबराबरको प्रतिशेयर १०० रुपैयाँ दरका ८ लाख ६० हजार कित्ता शेयर आयोजना प्रभावित क्षेत्रका स्थानीयका लागि निष्कासन गरिएको छ।
स्थानीयलाई छुट्याइएको शेयरमध्ये ३ लाख ४४ हजार कित्ता शेयरमा आयोजनाबाट अतिप्रभावित क्षेत्र सोलुखुम्बुको सोलुदुधकुण्ड नगरपालिका वडा नं १ र २ का स्थानीयलाई र बाँकी ५ लाख १६ हजार कित्ता प्रभावित क्षेत्र सोलुदुधकुण्ड नगरपालिकाका १ र २ बाहेक अन्य वडाका स्थानीयका लागि बिक्री खुला गरिएको छ।
यो आइपीओमा स्थानीयले न्यूनतम १० कित्तादेखि अधिकतममा १० हजार कित्ताका लागि आवेदन दिन सक्नेछन्।
स्थानीयले माछापुच्छ्रे बैंक, नेपाल बैंक, प्रभु बैंक र एनएमबि बैंकका सल्लेरी शाखाबाट र धितोपत्र बोर्डबाट अनुमति लिई आस्बा सेवामा सहभागी बैंक तथा वित्तीय संस्था र तिनका तोकिएका शाखा कार्यालयबाट पनि आवेदन दिन सक्नेछन्। वैदेशिक रोजगारीमा रहेका नेपालीले धितोपत्र बोर्डबाट अनुमति प्राप्त सी–आस्बा सेवामा सहभागी बैंक तथा वित्तीय संस्था र तिनका तोकिएका शाखा कार्यालयबाट र सीडीएससीको ‘मेरो शेयर’ आवेदन दिन सक्नेछन्।
माउन्ट एभरेष्ट पावरको आइपीओ बिक्री प्रबन्धकमा एनआईएमबि एस क्यापिटल रहेको छ।
प्रतिक्रिया