अनेराश्ववीयुका नेताहरु नै प्रतिबन्धित विप्लवसंग साठगाँठ गर्दै आपराधिक क्रियाकलापमा संलग्न रहेको खुलासा

सत्तारुढ नेपाल कम्युनिष्ट पार्टी नेकपाको भातृ संगठन अनेराश्ववीयुका नेताहरु नै प्रतिबन्धित नेत्रबिक्रम चन्द विप्लव नेतृत्वको माओवादीका नेताहरुसंग साठगाँठ गर्दै आपराधिक क्रियाकलापमा संलग्न रहेको खुल्न आएको छ । अखिल केन्द्रिय सदस्य दुधराज लामा, अखिलको काभ्रे जिल्ला सदस्य समीप त्रिपाठी, नेकपाकै स्थानीय नेता सिजन भन्ने मान बहादुर तामाङ र स्थानीय गुण्डा नाईकेको रुपमा चिनिने डेनी भन्ने टेन्सन लामाले विप्लव माओबादीका काभ्रे जिल्लाका नेताहरुसंगको मिलेमतोमा गैरकानुनी क्रियाकलाप मच्चाउँदै आईरहेको प्रहरीले जनाएको छ ।

विप्लव माओवादीका काभ्रेको शीशाखानी गाउँपालिका ५ का श्याम कृष्ण भनिने सागर मैनाली र तिलक लामासंग मिलेर उनीहरुले काभ्रेमा आतँक मच्चाईरहेको बुझिएको छ । विप्लव माओवादीको कमाण्डर भन्दै स्थानीयलाई तर्साउँदै हिँड्ने प्रभात भन्ने दुर्गा तामाङसंग समेत उनीहरुको उठबस रहेको श्रोतले जानकारी दिएको छ ।बोधिचित्तको व्यापारमा समेत संलग्न हुँदै सो समुहले प्रतिबन्धित काममा सक्रियता बढाउने गरेको जानकारी प्राप्त भएको छ ।

काभ्रेको रोशी गाउँपालिका ५ नागबेलीमा रहेको बोधिचित्तको व्यापार समेत गर्दै सो समुहले विप्लव माओवादीका लागि हातहतियार किन्ने काममा समेत संलग्न हुने गरेको श्रोतले जानकारी दिएको छ । उक्त समुहले काभ्रेको रोसी गाउँपालिका ५ मा पर्ने ब्लु साईन क्रसर उद्योगमा एकबर्ष अघि आगोलागी गरेको मुद्धामा प्रहरीको खोजिमा रहेका छन् । काभ्रेको सल्ले बुम्लो गाउँपालिकामा रहेको एनसेलको टावर ध्वस्त बनाएको आरोपमा समेत गृहमन्त्रालयमा उजुरी परी उनीहरु प्रहरीको खोजी लिष्टमा रहेका छन् ।