काठमाडौँ । नेपाली कांग्रेसभित्रको इतर समूहका दुई मुख्य नेताहरू डा. शेखर कोइराला र महामन्त्री गगन थापा ११ महिनापछि भेटवार्तामा जुटेका छन्।
शुक्रबार बिहान डा. कोइरालाको बालुवाटारस्थित निजी सचिवालयमा भएको भेटमा पार्टीको आन्तरिक अवस्था, आगामी रणनीति र सहकार्यका सम्भावनाबारे छलफल भएको जनाइएको छ।
कोइरालाका स्वकीय सचिव दिनेशचन्द्र थपलियाका अनुसार यो भेटलाई दुई नेताबीचको सम्बन्ध सुधारतर्फको सकारात्मक संकेतका रूपमा लिन सकिन्छ। “११ महिनापछि पहिलोपटक भेटघाट भएको हो, पार्टीभित्रको समन्वय र सहकार्यका विषयमा कुराकानी भएको छ,” थपलियाले जानकारी दिए।
पछिल्लो पटक असार ३० मा भेट
यसअघि उनीहरूबीच गत वर्ष असार ३० गते मन्त्री चयनका विषयमा छलफल भएको थियो। त्यसपछि संवादमा देखिएको दूरीले पार्टीभित्रै नेताहरूबीच असमझदारी गहिरिएको चर्चा हुन थालेको थियो।
१४औँ महाधिवेशनमा एउटै प्यानलबाट सभापति र महामन्त्रीका लागि उम्मेदवारी दिएका शेखर र गगनको समूह पार्टीमा सुधार, पारदर्शिता र जवाफदेहिता स्थापना गर्न एकीकृत रूपमा अघि बढिरहेको थियो। तर महाधिवेशनपछि पार्टीको निर्णय प्रक्रिया, सत्ता साझेदारी र नेतृत्व शैलीप्रति दृष्टिकोण फरक पर्दै जाँदा उनीहरूबीच टाढिएको बुझिएको थियो।
सहकार्यतर्फ सन्देश
पार्टीभित्र नेतृत्वको शैली र आगामी राजनीतिक चुनौतीहरूका सन्दर्भमा इतर समूहको एकताबद्ध भूमिका महत्वपूर्ण हुने विश्लेषण भइरहेका बेला भएको यो भेटलाई महत्त्वका साथ हेरिएको छ।
बैठकमा गहिरो राजनीतिक सहमति नभए पनि भविष्यमा नियमित संवाद र सहकार्य बढाउने प्रस्ताव सकारात्मक रूपमा अघि बढाइएको स्रोतले जनाएको छ।
कांग्रेसमा नेतृत्वका विकल्प र भावी रणनीतिको विषयमा इतर समूहका नेताहरूबीच फेरि संवाद सुरु हुनु कांग्रेसको आगामी राजनीतिक भविष्यका लागि सकारात्मक संकेतका रूपमा लिइएको छ।
पार्टीभित्रको सक्रियता
हाल नेपाली कांग्रेस सरकारमा सहभागी रहेको छ भने विपक्षी दलहरूबाट सशक्त भूमिका निर्वाह गर्नुपर्ने चुनौती छ। यस्ता बेला पार्टीभित्रको एकता, विशेषगरी इतर समूहभित्रको समन्वय, पार्टीको धारणा स्पष्ट गर्न र आगामी रणनीति बनाउन निर्णायक हुने विज्ञहरूले बताएका छन्।
अबको दिनमा शेखर र गगन समूहबीचको सहकार्य पार्टीभित्र सन्तुलन कायम गर्न र नेतृत्वमा जवाफदेहिता माग्न सशक्त आधार बन्न सक्छ। भेटवार्ताले सम्बन्ध सुधारको संकेत दिए पनि राजनीतिक सहकार्य पुनः कसरी अघि बढ्छ भन्ने कुरा अबको व्यवहारिक निर्णयहरूमा निर्भर रहनेछ।




















प्रतिक्रिया