काठमाडौँ । पूर्व राष्ट्रपति विद्यादेवी भण्डारीले आफू अझै पनि राजनीतिमा सक्रिय रहेको स्पष्ट पारेकी छन्। शुक्रबार विराटनगरमा सुरु भएको उप–प्रमुख तथा उपाध्यक्षहरूको राष्ट्रिय भेलालाई सम्बोधन गर्दै उनले यो अभिव्यक्ति दिएकी हुन्।
कार्यक्रममा सहभागी एक प्रतिनिधिले पूर्व उपराष्ट्रपति नन्दबहादुर पुनको सक्रिय राजनीतिमा पुनः प्रवेशपछि भण्डारीको राजनीतिक भविष्यबारे जिज्ञासा राखेका थिए। सो प्रश्नको जवाफ दिंदै भण्डारीले भनिन्, “म अहिले पनि सक्रिय राजनीतिमा छु।”
पूर्व एमाले नेतृसमेत रहेकी भण्डारीले नेकपा (एमाले) को अध्यक्ष बन्नेबारे सोधिएको प्रश्नमा भने समय आएपछि मात्रै जवाफ दिने संकेत गरिन्।
भेलामा उनले महिलाको राजनीतिक सहभागिता घट्दो क्रममा रहेको भन्दै चिन्ता व्यक्त गरिन्। गठबन्धनका नाममा राजनीतिक दलहरूले महिलाको प्रतिनिधित्व घटाएको आरोप लगाउँदै भण्डारीले भनिन्, “महिलाको प्रतिनिधित्व गम्भीर रूपमा घटेको छ, यसमा सबै दलले ध्यान दिन आवश्यक छ।”
उनले प्रतिनिधित्वको सन्तुलन कायम नगर्दा लोकतान्त्रिक मूल्य नै कमजोर हुनेतर्फ चेतावनी दिइन्। भण्डारीको भनाइमा, स्थानीय तहका महिला जनप्रतिनिधिहरूले नेतृत्व विकासको अवसर पाउनुपर्छ, न कि केवल औपचारिक भूमिकामा सीमित हुनुपर्छ।
पूर्व राष्ट्रपति भण्डारीले सुशासन र विकासका विषयमा पनि धारणा राखेकी छन्। जनप्रतिनिधिहरू जनताको अपेक्षा अनुसार काम गर्नुपर्ने बताउँदै उनले भनिन्, “हामी सबैको ध्यान अब सुशासन र विकासमा केन्द्रित हुनुपर्छ।”
भेलामा मुलुकभरिका उप–प्रमुख र उपाध्यक्षहरूको उपस्थिति रहेको थियो। कार्यक्रममा महिला नेतृत्व, नीति निर्माणमा पहुँच, र संघीयतालाई प्रभावकारी बनाउन स्थानीय तहको भूमिका विषयमा विस्तृत छलफल भएको आयोजकले जनाएका छन्।
पूर्व राष्ट्रपति भण्डारीको अभिव्यक्तिले उनको राजनीतिक सक्रियता कायम रहेको संकेत दिएको छ भने महिलाको प्रतिनिधित्वमा भइरहेको पछाडि फर्काइप्रति स्पष्ट असन्तुष्टि पनि देखाएको छ।




















प्रतिक्रिया