काठमाडौं । उद्योग, वाणिज्य तथा आपूर्ति मन्त्रालयले उद्योगी–व्यवसायीलाई उच्च मनोबलसहित अघि बढ्न आह्वान गरेको छ । सोमबार मन्त्रालयका सचिव डा. रामप्रसाद घिमिरे र क्षेत्रीय संस्थासँग गरिएको छलफलमा नयाँ वातावरणसहित निजी क्षेत्रको सहकार्य आवश्यक रहेको बताइएको हो ।
सचिव डा. घिमिरेले आवश्यक कच्चा पदार्थ आयातका सामानमा कुनै अभाव नहुने जानकारी गराउँदै माग, आपूर्ति र प्रतिकूल प्रभाव पार्ने वस्तु सूची बनाउन, नगरस्तर उत्पादन, पेट्रोलियम, दुग्धजन्य, बिक्रेता लगायतसँग समन्वय गर्न निर्देशन दिए । “निजी व्यवसायमा ठूलो असर पर्ने देखिएका सामग्री आयातमा सहजता ल्याउन सरकार प्रतिबद्ध छ,” उनले भने ।
मन्त्रालयले आयात सहज बनाउन कोरोनाकालमा बन्द गरिएका दक्षिणतर्फका नाका समेत खुलाउन प्रयास भइरहेको जानकारी दिएको छ । “भारतीय पक्षसँग निरन्तर छलफल भइरहेको छ, आवश्यक नाका खोल्ने सहमति भए पनि सूचनामा ढिलाइ भएको छ,” सचिवालय स्रोतले बतायो ।
छलफलमा नेपाल उद्योग वाणिज्य महासंघ, होटेल संघ, व्यापार संघका पदाधिकारीले व्यवसायमा देखिएका चुनौती सुनाएका थिए । सहभागीहरूले भन्सारमा देखिने समस्या, गुणस्तर परीक्षणमा हुने ढिलाइ, नाकामा रोकावट, उत्पादन लागत बढ्नु, होटल र खुद्रा व्यवसायमा आएको असरबारे जानकारी गराएका थिए ।
छलफलमा सहभागी महासंघका अध्यक्ष भेण्डराज पाण्डेले ‘अर्थतन्त्र अघि बढाउन उद्योग र व्यवसायलाई प्रोत्साहन गर्ने वातावरण आवश्यक छ’ भन्दै सरकारले भरोसा जगाउने भूमिका खेल्नुपर्ने बताए । “आगो, महामारी र नाकाबन्दी जस्ता घटनाले निजी क्षेत्रलाई हतोत्साहित तुल्याएको छ, त्यसलाई सम्बोधन गर्न सरकार सकारात्मक हुनु जरुरी छ,” उनले भने ।
मन्त्रालयले निजी क्षेत्रलाई आत्मविश्वासी बनाउन निरन्तर संवाद र सहकार्यलाई निरन्तरता दिने प्रतिबद्धता जनाएको छ ।
प्रतिक्रिया