ट्राफिक कारबाहीमा एकैदिन १८ लाख ७६ हजार राजस्व सङ्कलन

काठमाडौँ । पछिल्लो २४ घण्टामा सवारी नियम उल्लङ्घन गर्ने एक हजार ८०६ चालक कारबाहीमा परेका छन् । उक्त कारबाहीबाट राज्यकोषमा रु १८ लाख ७६ हजार ५०४ राजस्व संकलन भएको छ ।

काठमाडौँ उपत्यका ट्राफिक प्रहरी कार्यालयका अनुसार मादक पदार्थ सेवन गरेर सवारी चलाउने ७७ जना, नियमविपरीत ‘राइड सेयरिङ’ गर्ने १६२ जना, ट्राफिक सङ्केत उल्लङ्घन गर्ने १०६ जना तथा तीव्र गतिमा सवारी चलाउने ८८ जनामाथि कारबाही गरिएको हो ।

त्यस्तै, लेन अनुशासन पालना नगर्ने ८४ जना, निषेधित क्षेत्रमा हर्न बजाउने ३९ जना, सडक पेटीमा सवारी पार्किङ गर्ने ७७ जना, एकतर्फी सडकमा सवारी चलाउने १११ जना र अन्य विभिन्न ट्राफिक नियम उल्लङ्घन गर्ने एक हजार ६२ जनालाई पनि कारबाही गरिएको प्रहरीले जनाएको छ ।