युवा आक्रोश र देशको अवस्थाबीच गगन थापाको भूमिका महत्वपूर्ण: मिश्र

काठमाडौं । नेपाली कांग्रेसका सभापति गगन थापाको पछिल्लो राजनीतिक सक्रियता र ‘छटपटाहट’लाई कांग्रेस नेता मनिष मिश्रले सकारात्मक रूपमा व्याख्या गरेका छन् । उनले थापालाई संघर्षशील, लोकतन्त्रप्रेमी तथा दूरदर्शी नेताका रूपमा चित्रण गर्दै पार्टीभित्र उठाइएका प्रश्नहरू स्वाभाविक भएको बताएका छन् ।

मिश्रकाअनुसार, विद्यार्थी राजनीतिबाट पार्टी सभापतिसम्मको यात्रा थापाका लागि सहज थिएन । विशेष महाधिवेशनजस्ता चुनौतीपूर्ण अवस्थाबाट गुज्रिँदै उनले नेतृत्व सम्हालेको उल्लेख गर्दै उनले लिएका निर्णयहरूलाई दीर्घकालीन सोचसहित हेर्नुपर्ने बताए ।

उनले देशको कमजोर आर्थिक अवस्था, युवाहरूमा बढ्दो निराशा र नेतृत्वप्रति घट्दो विश्वासकाबीच थापाले पार्टीभित्र सुधारको आवाज उठाउनु आवश्यक रहेको धारणा राखे । यस्तो अवस्थामा सत्तारूढ दलभित्रैबाट प्रश्न उठाउनु जायज भएको उनले बताएका छन् ।

मिश्रले कांग्रेसलाई पुनः जनविश्वास योग्य बनाउन थापा लागिपरेको उल्लेख गर्दै पार्टीभित्र एकता, पारदर्शिता र जिम्मेवार नेतृत्व आवश्यक रहेको बताए । पुरानो शैलीमा अडिग रहनुभन्दा समयअनुसार परिवर्तन गर्नुपर्नेमा उनले जोड दिएका छन् ।

उनकाअनुसार अहिलेको विषम परिस्थितिमा कांग्रेसले पुनः अभिभावकीय भूमिका निर्वाह गर्नुपर्ने समय आएको छ । विगतमा लोकतन्त्र स्थापना गरेको जस्तै अब समृद्धिका लागि पनि पार्टीले अग्रसरता लिनुपर्ने उनले बताएका छन् ।

मिश्रले अन्त्यमा कांग्रेसका सबै नेता–कार्यकर्तालाई एकताबद्ध भएर अघि बढ्न, अग्रजको अनुभव र युवाको ऊर्जा समेटेर काम गर्न आह्वान गरेका छन् ।