Logo

प्रमुख समाचार

‘सरकारको एक वर्षलाई जनताले कालरात्रि वर्षको रुपमा लिएका छन्’



प्रमुख प्रतिपक्षी दल नेपाली कांग्रेसका नेता एवम् पूर्वमन्त्री एन.पी. साउदले वर्तमान सरकारको एक वर्षे कार्यकाललाई जनताले कालरात्रि वर्षको रुपमा लिएको खरो टिप्पणी गरेका छन् ।

शनिबार रिपोर्टर्स नेपाल डटकमसँगको कुराकानीमा नेता साउदले यस्तो प्रतिक्रिया दिएका हुन् । उनले भने,‘सरकारको यो एक वर्षे कार्यकालको मुल्यांकन गर्ने हो भने सरकार जनताका अपेक्षाहरु पूरा गर्ने काममा असफल भएको छ । संविधान कार्यान्वयनको सन्दर्भमा प्रान्तीय र स्थानीय सरकारलाई सशक्तीकरण गर्नुपर्नेमा राज्यका अधिकारहरु संविधान विपरित आफूमा केन्द्रित गरेको छ।’

साउदले अघि भने,‘अहिले विकास निर्माण तिव्र भएको छैन् । विदेशी लगानी आकर्षित भएको छैन् । सरकारले रोजगारी प्रर्वद्धन गर्न सकेको छैन् । आकाशे वर्षाका कारण कृषि उत्पादनमा केही सकारात्मकता देखिएपनि यसलाई व्यवसायीकरण गर्ने चूनौति पूरा गरेको छैन् ।’

उनले पछिल्लो सयम मुलुकमा गरिबी बढेको समेत दृष्टान्त पेश गरे । उनले थपे,‘ भ्रष्टाचार बढेको कुरा टा«न्सपेरेन्सी ईन्टरनेश्नलको रिपोर्टले देखाईसकेको छ । राज्यले सहकारी, वित्तिय संस्था र गैरसरकारी संस्थाहरुलाई नियन्त्रण गर्न खोजेको छ ।’

त्यस्तै यातायात क्षेत्रको सिण्डिकेट हटाउँछु भनेर ठूलो स्वरमा भनिएपनि सरकार यो विषयमा पनि मौन बसेको उनको आरोप छ । सरकारले विदेश सम्बन्धलाई सन्तुलित बनाउन नसकेको साउदले आरोप लगाए । उनले भने,‘विदेश सम्बन्ध असन्तुलित छ । छिमेकीसँगको सम्बन्ध लम्पसारवादमा आधारित छ । चीनसँग राम्रो सम्बन्ध भएको कुरा पटक–पटक गरिएपनि रेलदेखि अन्य कुरामा ठोस अनुदानको आश्वासन नपाईसकेको अवस्था छ ।’

उनले पश्चिमी देशहरुसँगको सम्बन्धमा पनि अहिले उतारचढाव आएको टिप्पणी गरे । उनले भने,‘भेनेजुएला प्रकरणले त लामो समयदेखि हामीसँग सुमधुर सम्बन्ध रहेको अमेरिकालाई चिढ्याउने काम भएको छ ।’

त्यस्तै उनले संविधानमा धर्मनिरपेक्षता लेखिएपनि वर्तमान सरकारले क्रिश्चियन तथा ईसाई सम्मेलनहरुको नेपालमा आयोजना गरेर धर्मान्तरणलाई प्रसय दिएको गम्भिर आरोप लगाए ।

महँगी ह्वात्तै बढेको सुनाउँदै साउदले भने,‘सरकारले खर्च गर्न सकेको छैन् । विकास निर्माणका प्रक्रियाहरु अघि बढेका छैनन् । यसको नकारात्मक असर उद्योग व्यवसायीहरुलाई परेको छ । समग्रमा यो एक वर्षलाई नेपाली जनताले काल रात्रि वर्षको रुपमा लिएका छन् । यो सरकार एक वर्षमा पुरै असफल भएको छ ।’

प्रकाशित मिति : फाल्गुन ४, २०७५ शनिबार  २ : १७ बजे