काेराेना खोप किन्न पाँचखालले संघ सरकारसँग माग्यो स्वीकृति

काभ्रेकाे पाँचखाल नगरपालिकाले कोभिड-१९ विरुद्धको खोप खरीदका लागि संघ सरकारसँग स्वीकृति मागेको छ।

४० हजार डोज खोप किन्ने भन्दै नगरपालिकाका मेयर महेश खरेलले स्वास्थ्य तथा जनसंख्या मन्त्रालयसँग खरीद अनुमति माग गरेका हन्।

खरेलका अनुसार मन्त्रालयले स्वीकृति दिए लगत्तै प्रक्रिया थालेर जेठ महिनाभित्रै आवश्यक खोप पाँचखालमा ल्याइनेछ। खोप खरीदका लागि प्रतिडोज नेपाली रुपैयाँमा दर निर्धारणको मागसमेत पत्रमा गरिएको छ। नगरमा १८ वर्ष माथिका करिब २० हजार नागरिक रहेकाले पहिलो र दोस्रो डोजका लागि ४० हजार डोज खोप खरीद गर्नुपर्ने छ। 

पाँचखालमा कोभिडविरुद्धका ‘फ्रन्टलाइन’का स्वास्थ्यकर्मी तथा कर्मचारीले भने दुवै चरणका खोप लगाइसकेका छन्।

पाँचखालमा कोरोनाको दोस्रो लहर शुरुपछि हाल १७७ पुरुषसहित ३२६ सक्रिय कोरोना सङक्रमित छन् भने चारले ज्यान गुमाइसकेका छन्। जसमध्ये नगरको आइसोलेसनमा ७, अस्पताल आइसोलेसनमा २ र होम आइसोलेसनमा १२३ सङ्क्रमित रहेका छन्।