Logo

अर्थ

ध्वस्त भाटभटेनी पुननिर्माणको घोषणा- ‘हामी फेरि उभिनेछौं’



काठमाडौं । जेनजी आन्दोलनको बेला प्रदर्शनकारीहरुको निशानामा परेका भाटभटेनी सुपरमार्केटले पुन: सञ्चालनमा फर्किने प्रतिबद्धता व्यक्त गरेको छ ।

देशभरका विभिन्न भाटभटेनी शाखाहरू जेनजी आन्दोलनको ठुलो क्षति पुर्‍याएका थिए । पसलमा आगजनी, तोडफोड र लुटपाटजस्ता घटनाले गम्भीर आर्थिक नोक्सानी पुर्‍याएको थियो ।
‘दुःखद क्षणहरु गुज्रिए, तर आशा हराएको छैन । आज हाम्रो पसल ध्वस्त भए पनि, तपाईहरुको साथले हामी अझ मजबुत महसुस गरिरहेका छौं । हजारौं सहयोगी हातहरुले सफा गर्न मद्दत गरिरहेका छन्, आँसु पुछिरहेका छन् र फेरि हामीलाई उठ्न शक्ति दिइरहेका छन् ।’ भाटभटेनीले आफ्नो सन्देशमा भनेको छः’भाटभटेनी फेरि उभिनेछ । तपाईहरुको साथमा, हामी भविष्यलाई अझ उज्यालो बनाउनेछौं ।’

जेनजी आन्दोलनका क्रममा अराजक समूहले देशभरका भाटभटेनी आउटलेटहरुलाई टार्गेट बनाएर आक्रमण गरेको थियो ।
यो क्रममा टोखा, सात दोबाटो, अनामनगर, सानागाउँ, यूनाइटेड टेड सेन्टर, पाटन र नेपालगञ्जमा रहेका भाटभटेनीका स्टोरहरु पूर्ण रुपमा सुरक्षित रहेका थिए । बाँकी २१ आउटलेटमा क्षति पुगेको थियो ।

भवनसहित पूर्ण रुपमा क्षतिग्रस्त भएका स्टोरहरुमा टंगाल, महाराजगञ्ज, बौद्ध, कोटेश्वर, बालुवाटार वेयरहाउस, पोखरा, चितवन, हेटौडा, विर्तामोड, दमक, विराटनगर र धरान रहेका छन् ।

भवन तोडफोड तथा लुटपाट भएका शाखाहरुमा कलंकी, ठिमी, बालाजु,  जनकपुर, बुटवल, वीरगञ्ज, धनगढी, इटहरी र भैरहवा रहेका छन् ।

भाटभटेनीले यो आक्रमणबाट अरबौंको क्षति व्यहोरेको छ भने त्यहाँ कार्यरत ५ हजार बढी कर्मचारी कामदारले तत्कालका लागि रोजगारी गुमाएका छन् ।

यति ठूलो क्षति व्यहोर्दा समेत हतोत्साही नहुने भाटभटेनी सञ्चालक मीनबहादुर गुरुङको पुननिर्माणको उद्घोष र उच्च मनोबलको सर्वत्र प्रशंसा भइरहेको छ । सामाजिक सञ्जालभरि भाटभटेनीलाई सबैले प्रोत्साहन र हौसला दिइरहेका छन् ।

प्रकाशित मिति : २७ भाद्र २०८२, शुक्रबार ११:३९   :  बजे

27
Shares

अनलाइनपाना डटकममा प्रकाशित सामग्रीबारे कुनै सूचना, गुनासो, तथा सुझाव भए हामीलाई onlinepana@gmail.com मा लेखी पठाउनुहोला ।