सहकारी बैंकको अध्यक्षमा लक्ष्मी उप्रेती निर्वाचित

काठमाडौँ । राष्ट्रिय सहकारी बैंक लिमिटेडको अध्यक्षमा लक्ष्मीप्रसाद उप्रेती निर्वाचित भएका छन् । ७ जना सञ्चालक समितिका सदस्यहरुकाबिच भएको मतदानमा उप्रेतीले ५ मत पाएर अध्यक्षमा निर्वाचित भएका हुन् ।

अध्यक्षका प्रत्यासी परितोष पौड्यालले २ मत पाएको सञ्चालक समिति स्रोतले जनाएको छ । बैंकको जेठ ९ गते सम्पन्न निर्वाचनबाट सात प्रदेशका सात जना सञ्चालक निर्वाचित भएका थिए।

सञ्चालक समितिका सदस्यहरूको बहुमतबाट अध्यक्ष चयन गर्ने पछिल्लो पटक संशोधित विनियम अनुसार बिहीबार भएको सञ्चालक समितिको बैठकमा मतदान भएको थियो । मतदानमा उप्रेतीको पक्षमा ५ जना र परितोष पौड्यालको पक्षमा २ जनाले मतदान गरेका थिए ।

राष्ट्रिय सहकारी महासङ्घको सञ्चालक रहेका पौडेल बैंकको अध्यक्ष बन्नका लागि सहकारी बैंकको सञ्चालक बन्न आएका थिए । तीन राजनीतिक दलहरूको सहमतिमा बागमती प्रदेशबाट निर्वाचित पौड्याललाई अध्यक्ष बनाउने सहमति भएको थियो ।

तर बैंकका निर्वाचित सञ्चालकहरूले बैंकका निवर्तमान लेखा सुपरिवेक्षण समितिका संयोजक लक्ष्मीप्रसाद उप्रेतीलाई निर्वाचित गरेको हो । उप्रेती कोशी प्रदेशबाट सर्वसम्मत निर्वाचित भएका थिए ।

२०७० मा लेखा सुपरिवेक्षण समिति सदस्य तथा २०७५ र २०७९ मा लेखा सुपरिवेक्षण समितिका संयोजक रहेका उप्रेती बैंकको आगामी कार्यकालका लागि अध्यक्ष चयन भएका हुन् ।

तीन राजनीतिक दलबिच गठबन्धन भएर सहकारी बैंकको निर्वाचनमा दुई समूहमा विभाजन भएका छन् । एमालेका आधिकारिक उम्मेदवार पौड्याललाई जम्मा दुई मत परेको छ ।