नापोली कोपा इटालियाको फाइनलमा प्रवेश गरेको छ । सेमिफाइनल अन्तर्गत शनिबार राति भएको दोस्रो लेगमा इन्टर मिलानसँग १–१ को बराबरी खेलेको नापोली समग्रमा २–१ को जितसहित फाइनलमा पुगेको हो ।
अवे मैदानमा भएको पहिलो लेगमा नापोली १–० ले विजयी भएको थियो । शनिबार राति घरेलु मैदानमा भएको खेलमा दोस्रो मिनेटमा नै गोल खाएको नापोलीले ४१ औँ मिनेटमा बराबरी गोल फर्काएको हो । दोस्रो मिनेटमा क्रिष्टियन एरिक्सनले इन्टर मिलानका लागि गोल गरेका हुन् ।
४१ औँ ड्रिस मार्तेन्सले नापोलीका लागि बराबरी गोल फर्काएका हुन् । उनी नापोलीका कीर्तिमानी गोलकर्ता पनि बनेका छन् । उनले नापोलीका लागि १२२ गोल गरिसकेका छन्, जुन यसअघिका कीर्तिमानी गोलकर्ता स्लोभाकियन मारेक हाम्सिकको भन्दा एक गोल बढी हो ।
अब उपाधिका लागि नापोलीले युभेन्टससँग प्रतिस्पर्धा गर्नेछ ।
प्रतिक्रिया