Logo

प्रमुख समाचार

कसैको वैशाखी लिएर हामी चुनावमा जान हुँदैन : शेखर कोइराला



काठमाडौं । नेपाली कांग्रेसका नेता डा. शेखर कोइरालाले संविधानको समावेशी चरित्रलाई परिवर्तन नगरी संविधान संशोधन गर्नुपर्ने बताएका छन् ।

सानेपास्थित पार्टी कार्यालयमा पार्टीनिकट प्रजातन्त्र सेनानी संघको प्रशिक्षण कार्यक्रममा कोइरालाले राजनीतिक स्थायित्वको लागि नेपाली कांग्रेस र नेकपा एमाले सम्मिलित सरकार बनेकोले यसलाई मजबुत बनाउनुपर्ने बताए ।

मिश्रित निर्वाचन प्रणालीबाट कुनैपनि राजनीतिक दलको बहुमत नआउने भन्दै उनले दलहरूको बहुमत ल्याउन प्रत्यक्ष निर्वाचन प्रणालीमा जानुपर्नेमा जोड दिए ।

कोइरालाले भने, ‘एक्लै चुनाव लड्न सक्ने क्षमता हामीले बनाउन सक्नुपर्‍यो । कसैको वैशाखी लिएर हामी चुनावमा जान हुँदैन । त्यो हामीहरुले बुझ्न जरुरी छ । राजनीतिक स्थायित्व भएन भनेर हामीले यो सरकार बनाएको हो । ६/६ महिनामा सरकार परिवर्तन हुने । अरु देशमा सरकार परिवर्तन हुँदा नीति परिवर्तन हुँदैन । हामीकहाँ नीति पनि परिवर्तन हुन्छ । यो कुराहरूले गर्दा हामीले सोच्यौँ काँग्रेस र एमाले सम्मिलित सरकार बनाऔँ । र निश्चित कुराहरुमा जाऔँ । राजनीतिक स्थायित्व दिनलाई संविधान संशोधन गर्ने हो कि भन्ने कुराहरु आयो ।’

नेता कोइरालाले सरकारले सुशासन कायम गर्नुपर्ने भन्दै भ्रष्टाचारमुक्त समाज बनाउने कुरालाई सरकारले नजरअन्दाज गर्न नमिल्ने पनिबताए ।

कांग्रेसलाई पुरानो अवस्थामा फर्काइ छाड्ने भन्दै उनले पार्टीलाई मजबुत बनाउनका लागि सक्रियतापूर्वक पार्टी काममा लाग्न नेता, कार्यकर्तालाई आग्रह गरे ।

प्रकाशित मिति : २१ श्रावण २०८१, सोमबार ०६:००   :  बजे

0
Shares

अनलाइनपाना डटकममा प्रकाशित सामग्रीबारे कुनै सूचना, गुनासो, तथा सुझाव भए हामीलाई onlinepana@gmail.com मा लेखी पठाउनुहोला ।