बिमानस्थलहरुको बिस्तारमा तीन तहको लागत साझेदारीबाट शुरु

संस्कृति, पर्यटन तथा नागरिक उड्डयनमन्त्री योगेश भट्टराईले नगारिक उड्डयन तथा हवाई क्षेत्रमा पछिल्ला दिन केही महत्वपूर्ण कामहरुको भएको बताएका छन् । सामाजिक सञ्जालमार्फत मन्त्री भट्टराईले पछिल्ला दिनमा उड्डयन तथा हवाई क्षेत्रमा भएका केही महत्वपूर्ण र नविन कामहरुबारे जानकारी दिएका हुन् । 

मन्त्री भट्टराईका अनुसार असोज १५ गते कर्णाली प्रदेशको राजधानी रहेको सुर्खेत विमानस्थलको बिस्तार र स्तरोन्नती गर्न केन्द्र सरकार र प्रदेश सरकारका बीतमा लागत साझेदारी पत्रमा हस्ताक्षर भएको छ । सो विमानस्थलको बिस्तारको काम अब तत्काल अघि बढ्ने उनले बताएका छन् । त्यस्तै वर्तमान सरकार गठन भएपछि कालोपत्रे भएका बझाङ, डोटी र बैतडी विमानस्थलमा असोज १७ गते परीक्षण उडान सम्पन्न भएको र अब त्यहाँ नियमित उडान सुरु हुने मन्त्री भट्टराईले जानकारी दिएका छन् ।

त्यस्तै प्रदेश १ को राजधानी रहेको बिराटनगर विमानस्थल बिस्तार तथा स्तरोन्नतीका लागि केन्द्र, प्रदेश र बिराटनगर महानगरपालिका बीचमा आज लागत साझेदारी पत्रमा हस्ताक्षर भएको समेत मन्त्री भट्टराईले बताएका छन् । अब यो बिस्तारको काम समेत अघि बढ्ने उनको भनाई छ । उनले बिमानस्थलहरुको बिस्तारको काम तीन तहको लागत साझेदारीबाट शुरु भएको समेत स्पष्ट पारेका छन्  ।

उनले भनेका छन्, ‘हाम्रो संघीयता पारस्पारिक सहयोग र साझेदारीतामा आधारित संघीयता हो । संबिधान र संघीयताको सोही मर्म र भावनाको कार्यन्वयन बिमानस्थलहरुको बिस्तारमा तीन तहको लागत साझेदारीबाट शुरु भएको छ ।’